الأحد، 24 يوليو، 2011

طباخ المشير


تقول الاسطورة ان المشير قديما كان يحارب بسيفين وياكل بمعلقتين ويضاجع امراتين ويركب حنطورين ويتحنطر



توطئة

الاحداث لا علاقة لها بالواقع ولا بالزمن الذى نعيش فيه والمشير المقصود هو احد القادة العسكريين الذين عاشوا سنة 500 ق.ج(قبل الانفجار العظيم)وعباد المشار اليه هو عباد الشمس فقد كان فىما قبل هذا التاريخ يفعل كل ما ورد فى المشاهد الستة وقد راينا ان تقتصر هذه المزحة على ستة مشاهد فقط حتى لا يشط بنا الخيال الى مناطق وعرة لاتحمد عقبى السير فيها فيتنكر يدنا او تتحطم لوحة مفاتيحنا او تنفجر الشاشة او تحترق البوردة او يحتج الهارد بتوقف لا مبرر له ونحن والله اعلى واعلم فى غنى عن ذلك كله اما عن كلمة التحرير التى سيمسكها علينا البعض ذلة فاحب ان اوضح ان 99%من ميادين ما قبل الانفجار العظيم كانت تحمل اسم التحرير وكان هناك اخوان ايضا ومجلس عسكرى وكل شىء كل شىء فارجو الا ياخذ احد الكلام ويحسس على راسه الممتلئة بالبطحات والجروح واود ان انوه ان هناك طبيب مصر قد قال فى العام 2334ان وجوم وغضب ذوى الوجوه الممتلئة بالبثور والتجاعيد يجعل مناظرهم اجارك الله .


اهداء
الى الذين اكلتهم مؤخراتهم نتيجة غياب السلطان الممدوح
اقول لهم ان قبلتهم سوف تظل هكذا حيرى مابين خيالات السلاطين والملوك فى عصر لفظ ابناءه جميع اشكال التسلطن والتسلط.



المشهد الاول...نهار التحرير
عربية كشرى بتنش واقف عليها الاسطى عباد مكلضم وايده على خده
مجهولين بيغافلوه من ورا ضهره ويخطفوا
يصرخ ...سلمية سلمية سلمية
محدش بيسمعه لان فيه 3 منصات شغالة فى الوقت ده مستقطبة انتباه الجميع

المشهد الثانى
يفيق عباد ليجد نفسه فى صالة طويلة فى اخرها بعض العسكريين المتحلقين حول طاولة كبيرة
يلطم ويولول...يالهوى يالهوى يالهوى هو انا عملت ايه؟
يلتفت اليه احد العسكريين ...متخفش يا عباد متخفش تعالى قرب
يهرع اليه بعدما مسح السجادة التى القى فوقها....اوامرك ياباشا ...اى خدمة للجيش اللى بياكلنا عيش وبيحمى الثورة
عسكرى ثان....هههههههههه استرجل يا اسطى عباد عيب كده احنا مش هناكلك ياراجل
عباد......خدامكو ياباشا خدامكوا والنعمة انا جاى التحرير على عينى انا مع اعتصام روكى ياباشا ومع المجلس العسكرى
عسكرى ثالث.....ميهمناش ميهمناش انت جاى هنا فى مهمة وطنية ياعباد
عباد...اتهطل ودلدل وسكت خالص
عسكرى رابع....انت هتبقى طباخ المشير يابنى شد حيلك
قاموا من حول الطاولة وغادروا الصالة بعدما ربتوا على كتفه واحد واحد وشجعوه بكلمات من قبيل ...ربنا معاك...استرجل...اوعى تخيب ظننا فيك


المشهد الثالث
عباد يقدم الغذاء للمشير
عباد...بالهنا والشفا ياسيادة المشير ياوش الخير ياقائد مصر نحو التغيير ولا يهمك ياباشا م العيال بتاعة التحرير دول انت اكبر من انك ترد عليهم ياباشا
المشير مبتسما...اقعد يا عباد اتغدى معايا اقعد
عباد ...يانهار اسود !ميصحش ميصحش
المشير حازما...اقعد
يقعد عباد
المشير ....ايه رايك فى البلد يا عباد؟
عباد...زى الفل والنعمة زى الفل قطع لسان اللى يقول غير كده
المشير...انت كنت بتقول غير كده
عباد يحمر وجهه ....انا؟...والله انا ماجيت التحرير غير لما ضاقت بيا يا باشا انا روكساوى صرف صدقنى ياباشا
المشير...مصدقك وعارف انك قبل روكسى كنت فى مصطفى محمود وكنت مع الناس اللى بتقول اسفين ياريس انا عارف عنك كل حاجة ياعباد متقلقش ...انا بس بهزر معاك ...فرفش كده عشان متاخدش استمارة ستة

المشهد الرابع....عباد يغسل رجل المشير بالليل على سبيل العمل الاضافى وتزويد الدخل

عباد...تعرف ياباشا ....انا بسمع عن معايكم انت واللواءات الافاضل كلام كتير بس مبصدقوش
المشير...زى؟
عباد...يعنى زى حكاية كشف العذرية...انا اعرف واحدة من البنات اللى اتبلوا عليكو دول ...دى مبتقعدش فى بيتها ياباا زى ما بتقعد فى شارع الهرم وملهاش علاقة بالتحرير اصلا ...دول عايزين يلطخو سمعتكوا ياباشا قدام الشعب
المشير .....هههههههههههههههه تيييييييييت ام الشعب ياجدع...فرفش كده يا راجل خليك حلو امال
عباد....بس متقلقش ياباشا انا خليت ابوها يديها علقة موت فبركتلها كام صورة كده واديتهم لابوها عشان تلم نفسها
المشير ينظر له باستغراب....انت غاوى شر بقى؟
عباد...لا يابااااااااااشا انا غاوى استقرار
المشير ...طب ايه رايك اننا عملنا كشف عذرية على بعض البنات اللى فى التحرير بجد
عباد ...لا ياباش مش معقول
المشير يصرخ...عليا الطلاق عملنا كده واحنا قصدنا نرهب ولا الكلب دول
عباد...ياباشا لاء متقولش كده
المشير يشد فى شعره ....عليا الطلاق احنا ثورة مضادة
عباد..ياباشا لاء لاء ياباش انت كويس والله انت كويس
المشير...ياعم بقولك احنا اللى عملناها
عباد...لاء بس انت كويس
المشير ....وحياة امك لادورك مكتب
عباد...بس انت كويس برضه

المشهد الرابع
عباد يسلك ودان المشير على سبيل الهواية

عباد...تعرف ياباشا...رغم انك دورتنى مكتب بس انا مبسوط
المشير يبتسم...اه انا عارف انت من النوعية اللى مبتجيش غير بكده وبتنبسط بالسك على قفاها
عباد...خدامينك ياباشا
المشير....ياخوفى ياعباد كان فيه ناس كتير زيك كده واتفرعنوا...ياخوفى كمان لانت تتفرعن زيهم
عباد...حاشا لله مش انا اللى اعض الايد اللى شغلتنى ياباش عيييييييييب
المشير ...قوللى ياعباد ايه اخبار الميدان؟
عباد...زباااااااالة زبالة ياباشا بعيد عنك كله ناس بتتكلم كلام مش فاهمه كده قال ايه حرية وكرامة وعدالة ناقص يقولوا ثورة ياباشا دى حاجة تقرف والله حاجة تقرف
المشير ينظر للسقف ويهرش فى شعره...الظاهر جايبنلى واحد معاق ينقطنى عشان اموت وينطوا ع الكرسى ...اطلع بره يالااااااااااا
عباد....بس انت كويس والله العظيم انت كويس


المشهد الخامس
عباد يطرطق اصابع المشير قتلا للوقت
عباد....الا صحيح ياباشا مبارك مش هيتحاكم؟
المشير...لاء
عباد...لاء ياباشا انت بتضحك عليا
المشير...ورحمة امك ماهيتحاكم
عباد...ياباشا ياباشا ...اطلع من دول
المشير....ههههههههه يضربه على قفاه ياراجل ياراجل خليك فتك ولفهم دول شوية حركات بيتعملوا ع التلفزيون واللى تحت الطرابيزة تحت الطرابيزة
عباد...اعوذ بالله تحت الطرابيزة؟...لاء الله الغنى انا مش شغال
المشير...نعم ياروح امك؟....خدوه اكشولى على عذريت الكلب ده
عباد...يلتفت والعساكر ممسكون به...بس انت كويس عليا النعمة انت كويس بس انت كويس انت كويس انت كويس


المشهد الخامس عباد يغسل شورت المشير فى اروانة بجانب المكتب

عباد...والنبى ياباشا ناولنى شوية رابسو
المشير بقرف....اخدم نفسك بنفسك ياكلب
عباد...خدامينك ياباشا
المشير ...اتعدل بدل ما اعدلك
عباد....معدول والنبى فى عرض النبى معدول بلاش كشوفات تانى معدول...بس انا محشور فى زورى كده سؤال ...هو ايه اللى لم الشامى ع المغربى ياباشا؟
المشير....وضح كلامك
عباد...يعنى ياباش المجلس العسكرى والاخوان
المشير...الدنيا مصالح
عباد...طب وهتخلوهم يحكموا البلد فعلا
المشير... يضحك ضحكة شريرة
عباد...دول لو مسكوا انا كنت اروح فيها
المشير يواصل الضح...هيمسكو هيمسكو بس هيمسكو حاجة تانية
عباد....والنعمة انت كويس...انت كويس ياباشا انت كويس


المشهد السادس
عباد يلمع الجزمة للمشير والورنيش ملغمط وشه
عباد...يعنى العيال المقيحة دى ياباش بتتمول من الخارج؟...مش باين ليهم يعنى
المشير...مين قالك بيتمولوا
عباد...انتو ياباشا
المشير...ههههههههههه حمار حمار قولتلك قبل كده دول شويتين لازم يتعملوا على التلفزيون
عباد...امال مين اللى بيتمول؟
المشير...مفيش جنيه بيدخل من غير علمنا يا مغفل
عباد....يعنى بتكذبوا؟
المشير...ايوه وفيها ايه؟...هو الكذب حرام؟
عباد...بيقولوا
المشير....مين اللى بيقولو؟
عباد... الشيوخ
المشير يتحدث فى الهاتف...ايوه يا رويعى....بلغ جميع الفضائيات الدينية والاوقاف والازهر ان الكذب مش حرام
عباد...واللله انت كويس ياباشا...انت كويس ...انت كويس كلهم بيقولوا عنك كلام قبيح بس انت كويس

هناك 5 تعليقات:

شمس النهار يقول...

:))))))))))

تصدق ضيعتلي الاكتئاب
وضحكتني في الاول
ولما قريت تاني خيطت
هموووووت وخااااااايفة بس مش من دول من الشعب المصري اللي بيحارب الثورة

غير معرف يقول...

هههههههههههههههههههههههههههه
حلوه

حلم بيعافر يقول...

شمس النهار

اى خدمة

حلم بيعافر يقول...

طباخ المشير

عارفك على فكرة

شمس النهار يقول...

علي فكرة عيطت مش الكلمة الملخبطة دي
:))))))