الثلاثاء، 6 سبتمبر، 2011

البلد الوحيدة اللى بتثور ومبيبانش عليها




مش من باب البكا على اللبن المسكوب ولا حاجة ان حد يقول كان ممكن وكان المفروض .بس فيه اشياء التبست على بعضها لدى ناس كتير محدش يقدر يزايد عليها لا فى الاخلاص للبد ولا فى الطهارة والنقاء ولا فى الثورية .ناس من الاخر خلاصة وكفاءة وزى العسل وضفرهم برقبة كتير جدا غيرهم .

فى مسالة حكم الثوار بالذات اللى بيثار حولها التشكيك كل خمس دقايق وبيتقال انهم كيان مهترىء مش منظم ومش عارف هو عايز ايه وملوش قائد وملوش لسان وملوش مناخير وملوش مش عارف ايه...ملقوش فى الورد عيب قالوله يااحمر الخدين.

مشهد التشتت والتخبط اللى عليه ائتلافات شباب الثورة ده مشهد مدبر من اطراف معروفة دخيلة على شباب الثورة عشان يبانوا ويظهروا كده قدام الراى العام ....دى اول حاجة.

الثوار لو كانوا حكموا عن طريق مرشحيهم اللى مكنوش هيختلفوا عليهم فى ظل الاجواء اللى كانت فيها ميادين التحرير فى مصر والتقسيمة كانت واضحة وسهلة ومقسمة بعضها قدام الدنيا كلها ...حد من الجمعية الوطنية للتغيير وحد من الاخوان وحد من المجلس العسكرى وارضاء للاحزاب الورقية اللى بيتقال عليها اصيلة وعريقة كفيبه حاجة اسمها مستشارين للتلاتة بتوع المجلس المدنى دول وكان دور المجلس العسكرى ساعتها يبقى دول انه سلاح فى ايد المجلس المدنى ده اللى بيحكم باسم الثوار مش يبقى زى الخازوق ضد اى رغبة ثورية فى الاصلاح زى مابيعمل مع عصام شرف.

ساعتها مكناش هنلاقى حد بيتلكك بقانون متفصل على مقاس الفاسدين...مش على الناس العادية...لازم تبقى بكرش وواكل ناسك وواكل الدنيا فى قلبك عشان القانون ده ينفعك ويبقى فى صالحك...مكناش هنلاقى حد بيتححجج بقانون زى ده قدام ناس خربوا البلد لمدة عقود طويلة من الزمن... مكناش هنشوف وش اسامة سرايا تانى ولا اشكاله مكناش هنلاقى رؤساء جامعات وعمداء بضان ومشبوهين تانى مكناش هنلاقى مخبرين ماسكين اكبر المؤسسات فى البلد تانى مكناش هنلاقى حد من اعضاء الحزب الوطنى مترشح فى الانتخابات تانى

ياااااحزنى يانى....ثورة ياجدعان ومش عارفين نمنع مرشحى الحزب الوطنى الفاسد المنحل اللى خرب البلد من الترشح؟؟؟؟

بالذمة لو الثوار كانوا حكموا مش كان المد الثورى كفيل بتطهير مصر فى اقل وقت ممكن؟؟؟....كنا ساعتها هنتلافى تاثير الجراثيم والميكروبات دى فى جسم مصر الثورة .

كل الفلول الموجودين فى كل المؤسسات فى مصر حاليا موجودين عشان الثوار محكموش

ولو الثوار كانوا حكموا كان زمانا خلصنا وريحنا دماغنا وابتدينا نشتغل ونبنى البلد بصحيح.

هو ياجدعان الناس اللى استبدلت وزارة الداخلية بجبروتها فى وقت لايذكر مش قادرة على تسيير الامور فى البلد؟

لو الثوار حكموا كانوا ممكن يخلصونا من التجار الزبالة اللى بيغلوا الاسعار عن طريق اللجان الشعبية وعن طريق اجهزة الرقابة اللى عايزة زرااااااااار يفعلها...مكنش ينفع المحاكمات العسكرية تبقى للتجار اللى بيحتكروا السلع الاساسية اللى الناس بتتلطم عشان تقدر توفرها؟؟؟

محدش يقول لو الثوار كانوا حكموا بقى عشان احنا اصلا تحدينا دللوقتى ان الثوار يحكموا .لما يحكموا نبقى نجحنا وعملنا ثورة .انما لما العسكر يحكم يبقى عملنا ايه.المجلس العسكرى عمال يطبطب ع الفلول بحجة انه مش قادر يخالف القانون .عامل زى واحد نام مع طوب الارض فى الحرام ومش راضى يستخدم الفرشة والمعجون اصلها بدعة .

الثوار؟..وهو فيه فى حلاوة الثوار ولا فى جمال الثوار ولا فى عقل الثوار ولا فى ذوق الثوار ولا فى ادب الثوار؟...اللى اتفقوا على قلب التاريخ مكنوش هيعرفوا يتفقوا على حكم بلد لمدة سنة ونص؟...ولو كان المجلس ارد خير ونيته صافية كان ساند مش تصدر المشهد ....كلنا عارفين ليه هو متصدر المشهد..كم الالغاز اللى طافية على السطح حاليا كفيلة بالاشارة للسبب اللى خلاهم يتصدروا المشد ويدوا للثوار ولمرشحيهم كتف.

ثم ان احنا كل مشاكلنا محتاجة حل ثورى مش حل تقليدى.من اول مشكلة الزبالة اللى فى الشوارع اللى الدولة ببيروقراطيتها العتيدة مش عارفة تحلها .لحد مشكلة ولاء الداخلية ..للناس ولا للسيد اللى ربنا مايفك حبسه ابدا.لحد رغيف العيش.للدقيق اللى البلد بتدفع حقه خمستاشر مرة .للتعليم اللى العيل من دول بيخشه فاهم ويطلع حمار.كانها مكنه بتاخده عاقل تطلعه اهبل.لحد علاقتنا بالدول اللى حوالينا وبالعالم.كله كله محتاج الثورى الجرىء المبتكر مش محتاج الجنرال اللى دبابته مكتفاه.

محدش يرجع ورا ويقول تعبت لان المشوار لسه طويل وطالما مكنش فيه حزم من الاول فى التعامل مع اعداء الثورة وقيادات الثورة المضادة يبقى هنتعب ومحدش يتعقل زى مانوارة نجم قالت لبلال فضل فى احد مقالاتها ان التعقل فى الطريق الثورى دى مش كويس واهما دول اتنين فاتحين جنب بعض والدكان فى وش الدكان ورفقاء مسيرة كفاح واحد فيهم يوم 25يناير خد الدوا بتاعه ونزل زى ماتيجى وتيجى وواحدة كانت بتصرخ لما كاتن بيتضرب عليهم رصاص

داحنا ماساتنا ياجدعان ان الثوار محكموش واللى حكم منطق تانى غير منطق الثورة وعلى راى عزمى بشارة عملنا ثورة والعسكر قالولنا تعالوا على جنب بقى وروحوا وسيبولنا واحنا عارفين هنعمل ايه....نقوم نفضل نعيب ونسب فى حاجة محصلتش وكانت امنية بالنسبة لنا؟!عشان محصلتش نقلل منها يعنى ؟!


هناك تعليقان (2):

شمس النهار يقول...

هي فين الثورة اصلا

؟؟؟؟

عاملة صورة علي البروفيل بتاع تويتر واحد واخد علي قفاة زعلانين هناك من الصورة
قلت لهم اللي مش حاسس انه بعد ده كله خد علي قفاة يقول لي شيليها
احنا اتنشلنا
واللامبارك حطلنا الحرامي قبل مايمشي

حلم بيعافر يقول...

اهيه

افتح النور؟:D