الأربعاء، 7 سبتمبر، 2011

اشمعنة يعنى عبدالناصر؟؟؟

كانوا بيشيلوه بالعربية اللى هوه راكب فيها


اول حاجة الانسان بيدور عليها وفق طبيعته البشرية هى انه يسد جوعه.حد يقدر يقعد اسبوع مياكلش؟..محدش...حد يقدر يقعد يومين ميشربش؟...محدش....حاجة بيولوجية مش قلة ادب يعنى .الجسم بيحتاجها ولو مااخدهاش هيموت .والحاجة دى موجودة فى قاعدة هرم ماسلو عالم النفس اياه.وعشان كده متلومش حد جعان لانه هيدور اول ماهيدور على الاكل اللى يسد بيه جوعه حتى ولو البلد ولعت بجاز.

مشفتش حد لغاية دللقتى قدم حل للجعانين اللى فى مصر .نص مصر تحت خط الفقر ونص مصر لاتملك قوت يومها اللى هو ابسط الحقوق .لسه محدش اخد خطوة تمنع الاحتكار فى السلع الاساسية اللى بناكلها.ازاى يعنى نشترى كيلو الرز بخمسة جنيه؟..وازاى نجيب كيلو السكر بستة جنيه والزيت بعشرة ؟...محدش قادر يكسر الاحتكار ده يعنى؟..الحكومة شغلانتها ايه ع المدفع اذا مكانتش تعمل ده؟

الانسان مش هيبدا يبص لبعيد الا اذا كان شبعان .حد الكفاف اللى يمنع الانسان من مدة الايد ويمنعه من المذلة والسؤال.الانسان عشان يكون انسان وتحاسبه على انسانيته لازم تكسر شهواته .تسد جوعه تجوزه تشغله تحسسه انه بنى ادم وبعدين حاسبه وخد منه زى ماانت عايز .مينفعش مثلا واحد ماشى من غير هدوم وانت تيجى تقوله تعالى اعزمك على اوبرا كارمن.مينفعش واحد عنده 30سنة ومااتجوزش وانت تيجى تقوله تعالى فيه حفلة لماجدة الرومى فى الاوبرا النهارده.هسيبك ويدخل فيلم درجة تالتة بطلته رقاصة من غير هدوم علطول....هو الانسان كده ...اشبع غريزته وحاسبه على انسانيته بعدين.

ايه خلى صورة عبدالناصر الزعيم المناضل الراجل الصعيدى تقر وترسخ فى الوجدان المصرى والعربى بالشكل اللى هى عليه ده؟...اسال كده جدك ولا جدتك عن زمن عبدالناصر والسادات ومبارك وشوف ردودهم وشوف الخير كان عامل ازاى فى العصور التلاتة .

ببساطة كانت العدالة الاجتماعية هى الاولوية.مكنش يحب حد يبات جعان.كان كل واحد بيلاقى يتجوز ويصرف على بيته.عشان كده كان بيتجاوز حيوانيته ويبص بقى للحاجات اللى بتميزه عن الحيوان..العقل والفكر .كله بيفكر فى مستقبل البد وكله مستعد يضحى وكله مستعد يعدى معاه البحر وكله بيندمج وبيتوحد فى مشروعات قومية زى السد العالى مثلا ....لو كاتنت سياسة مبارك دى فى الستينات كنا ممكن نقدر نبنى السد العالى؟؟...مستحيل كان حد يفكر اصلا فى البلد..ماتولع بجاز طالما مش لاقيين فيها قوتنا .

الراجل الجعان بيروح وبيجى مع اللقمة...السكر غلى يبقى يلعن ابو الثورة لابو الثوار شوية عيال غلوا علينا الحاجة...الحاجة رخصت يبقى تحيا الثورة اللى بغددتنا وخلتنا فى رغد من العيش ....ده ممكن يوضحلك اذرع الثورة المضادة اللى عايزة تقلب الناس على الثورة بتشتغل ازاى .عدو الثورة الاول حاليا هو احتكار السلع الغذائية الاساسية .

ومحدش يقول دول ناس بوهيميين بيدوروا على بطونهم واهالى الشهدا بيدوروا على دم.فيه فرق بين البوهيمى واللى مش لاقى اللقمة واللى مش عارف يفتح بيت فى الحلال ....

لو مكن للثوار الحكم كان زمان مشكلة الاحتكار دى فى طريقها للحل .لو نتاج الفضائيات الدينية سليم كان زمان مشكلة الاحتكار دى فسفوفسة وفرقعت .لو الاحزاب الورق اللى رلافعة شعار العدالة الاجتماعية كانت بتشتغل كانت عملت حاجة فى الحكاية دى .لو رجال الاعمال لهم خير فى البلد مكنش هيبقى فيه حاجة اسمها احتكار وتحكم فى قوت الناس .

الثورة رفعت شعار العدالة الاجتماعية ومش هتنجح وتلم حوالها الشعب كله غير لما تحققه عشان متجيش واحدة زى لميس جابر-خنوقة على حد وصف اسامة غريب التحرير-تفضل تتك على اوجاع الناس وتتاجر بالامهم فى سبيل تبرئة قاتل سفاح مجرم خاين .

عارفين لو الناس ضمنت بس قوت يومها وشافوا واحدة زى لميس جابر على شاشة التلفزيون هيعملوا ايه؟..هيتفوا فى وشها هى واشكالها.

الدكتور محمد الجوادى كان قال حاجة جميلة جدا مع ابراهيم عيسى من كام شهر...لازم الحكومة الموجودة تعمل على اسعاد الشعب .ومحمد باكوس احد مرشحى الرئاسة قال كلمة جميلة اوى ...عايز المجلس العسكرى يفتح للشعب حاجة ساقعة .

كسب قلوب الناس مهم جدا لانه هيخلق تيار شعبى يكنس ويطهر كل مؤسسات الدولة بجوار الحكومة الشريفة النضيفة العفيفة اللى لها نية تنضف -الجاية طبعا-مصر وترشها ميه وتزرع فيها عودين ياسمين شجرتين فل.

علمتنا الثورة ان القرار السياتسى يلزمه تيار شعبى يوازيه ويساعده ويقف جنبه عشان يصلب عوده كده ويشد حيله ويكون فعاااااااااااااااال.

هناك 4 تعليقات:

شمس النهار يقول...

الله ينور هأخد البوست ده عندي كده بحالة لطش واحطه في بوست
اكيد موافق طبعا
ام اوانطة انا ولا ايه
:))

حلم بيعافر يقول...

وانا اطول البوست بتاعى يروح عند شمس النهار؟))...

المدونة كلها تحت امرك بس متجيش جنب التلاجة لو سمحت:D

كايرو دراما دوت كوم يقول...

و الله عندك حق يا اخى..

الايام اللى فاتت دى رغم ان كان فيها مساوىء برده الا ان اهم حاجة على المواطن المصرى كانت موجوده الا و هى عزته و كرامته .. اللى بالتالى ناتجة بعد شبع و راحة .. مش جوع و قهر

اسعار العملات يقول...

الله يرحمه ويرحمناااااااااا