الاثنين، 12 سبتمبر، 2011

مجذوب





إسكندريلا  -وصية خيرى شلبى



الفلاحين بيموتوا وقبل ما يموتوا
بيوصوا ع الزرعة
الطيبين بيموتوا وقبل ما يموتوا
بيوصوا ع الشمعة
الزرعة تفضل طالعة
والشمعة تفضل والعة
لجل الحياة تستمر
لازمها نور وخضار
الزرع يفضل فاكر
كل ايد شالت وكل ايد حطت
وكل نقطة عرق
وكل يوم بيمر من هذه الاعمار
والنور بيفضل فاكر
اللى اتحرق لاجله
ماهو يعتبر نجله
اللى محى الضلمة
وفرشها بالانوار
ياحبيبتى ياللى الادان
شدك من النومة
قايمة تصلى الفجر
ياشاهدة كل مخاض
لكل يوم ونهار
افديكى يادى الدمعة
افديك يانار الشوق
للفتى المتغرب
هناك
خلف سور الجامعة
هناك
جوه المعسكر
بالبيادة ولبس الجيش
اوعاك تطول فى الغياب
وبينا ملح وعيش
دى الارض نساية الغايبين
والعاشقين الصهد والاسفلت
اوعاك تسد الباب
الضل هاجر مفارقين الشجر
الضل زى البشر
بيروح ويجى
وبيعتريه الضجر
من غربة الاصحاب
يامناكفة لسع البرد
وبتغسلى الهدمة
الحب عندك فرض
يامهادية قرص الشمس
وما يمتلكلك رد
متنسينيش فى الحكاوى
لما الولاد يتجمعوا
حواليكى وقت السرد
مجذوب ورا المعنى
ماتركتله سكة الا اما خطيتها
مااحنا كده المجاذيب
عن كشف كل بعيد
ماحد يمنعنا
معنى الحياة دى ايه؟
وفين يجوز نلاقيه؟
محشور فى وسط الورق
وبنكتبه كتابة؟
ولا فى رجفة بدن
على انين الربابة؟
ولا فى ساحة معركة
بجوار ازيز الطيارت
و دكة الدبابة؟
ولا فى ضحكة صبية
تضحك وتمشى
وتسيب وراا الوف
واقعين فى ليلها صبابا؟
فى حكمة الفيلسوف؟
ولا فى كلام مسطول؟
لو كنت اعرف اقول
لو كنت اعرف ماانجذبت
ياجاهلا معنى الحياة
مش كنت تبت؟
وخلعت توب الاسئلة؟
وندرتها عشق وصلاة؟
تقدر ياعاشق تفرق
مابين الزرع والمواويل؟
ماهى كلها فرحة
ماتفرق الغنوة عن الطرحة
طعم القانون ولا طعم الخوخ؟
ريحة الرطب ولا ريحة العود؟
اهو كله ضل
واهو كله طارح
واهو كله ممدود
تقدر ياعابد تمسك لسانك عن دعا؟
ولا قلبك عن ابتهال؟
دى الدنيا سجادة
فيها العبادة عزف
والتقوى مزيكا
والواصلين اوليا
شافوا اللى ماشفناه
واسترسلوا فى الوصف
ياحامل الامانات
ياواصف المخبوء
باء الجبل بالنسف
وسمعنا عنه ينوء
من تحت احمالك
ادعو تنول الشفا
بمزيد من المعرفة
وبطرح اعمالك

هناك 3 تعليقات:

yasmina يقول...

هااااااى

ازيك ؟

يارب تكون بخير

البوست عجبنى جدا وكلامه رائع بجد
احسنت الاختيار

تحياتى

حلم بيعافر يقول...

ياسمينا

مش اختيار..انا اللى كاتبه

شكلى هحرمك كده من الميراث

محمد عبد التواب يقول...

مقال رائع وكلام جميل شكرا لك وبالتوفيق ...