الثلاثاء، 13 سبتمبر، 2011

فضيحة وزير التربية والتعليم


اقرا هذا وقارن بين ما غار فى ستين داهية وما يصير الان

ان كان العنوان مستفز فسبب الكتابة اكثر استفزازا.

فضيحته ووكستنا.
والله ان كل مايفعله فضيحة وكل سكوتنا وكسة وخيبة .
اكثر من برنامج يظهر فيه وزير التربية والتعليم السيد احمد جمال الدين موسى ويعك كلامه بلطائخ الجهل بالوزارة التى يدير امورها .الادهى والامر انه فى كل حوار يجرى معه يصر على الانفراد بالجمهور وحده وعدم تلقى اى اتصالات او مداخلات من احد.

مذيعة برنامج 90دقيقة سالته اليوم عن مطلب عودة التكليف والتثبيت للمتعاقدين مع وزارة التربية والتعليم فاجاب كالتالى...

قال الحكومة ثبتت 4500 متعاقد من اصحاب المؤهلات المتوسطة و13000من حملة المؤهلات العليل(اداب على علوم على تربية على....سلطة يعنى)...اما بالنسبة للتكليف فانها سياسة حكومة لا دخل لى فيها.

يعنى تتعاقد وتثبت غير المؤهلين وتطرد المؤهلين فى الشارع بعد ان تغلق الابواب امامهم بحجة الكفاية وعدم الحاجة؟!

ما تقفلوا كلية تربية بقى طالما خريجينها مينفعوش.

فيه حد عاقل يقول كده؟!

فيه وزير عنده عقل يقول كده؟!


اى كلام عن تطوير التعليم بعد ذلك؟!

عندنا فى قريتنا مدرسة ابتدائية اغلب المدرسين فيها من حملة الدبلومات ...والمدرسة الاعدادية اغلب المدرسين فيها مش تربويين...لوقلنا ان ده كان زمان وخاص مش هنعرف نغير مع انك لوعايز الحق لازم تغير وتتعامل بحزم مع مشكلة زى دى بس زى بعضه سيب قديمه على قديمه بس متكررش اخطاء الماضى .

التلاميذ فى اعداى مبيعرفوش يكتبوا ...مدارنا اصبحت قلاع للامية المقنعة ...العيل بيدخل المدرسة ناصح شوية وبعدين ودانه بتطول بشكل تدريجى لحاد مابيتحول لحمار رسمى .

سياسة وزارة التربية والتعليم سياسة عقابية للطالب وللتربويين...لا التربويين بيشتغلوا ولا الطلاب بيتعملموا وعمار يامصر.اذا كانت سياسة حكومات سابقة هى التجهيل والتعمية وقتل كل ما يامل فيه الانبات والاثمار فلتكن سياسة حكومات الثورة مغايرة للماضى الهدام.اى عاقل يقول كده.

خيبة املى فى الاعلام لاتوصف .كل الاذين استضافوا الوزير اعتبروها قعدة سمر وحطوا مطالب المعلميت تحت الرجلين وسابوله الميكروفون.كانوا يقوموا يقعدوا بره الاستوديو احسن ويطلقوه علينا زى لميس جابر ولوقا بباوى وخلاص.حتى الذى علق من بعيد لبعيد على اخبار الاحتجاجات لم يراعى الصالح العام واخذ من الكلام مايمكن الاستعراض عليه والسخرية منه وترك صلب الموضوع.كان فى الاحتجاجات دى مطالب مهمة لو اتنفذت تبقى خطوة مهمة فى عملية اصلاح التعليم زى عودة التكليف لخريجى كليات التربية مثلا .بس كله عايز يستعرض وخلاص وميتكلمش فى المفيد.

بدون مبالغة ممكن اوجه نداء لاولياء الامور اقولهم فيه...اغيثوا ابنائكم ..

هناك 8 تعليقات:

سوااااااح في بحر الهم يقول...

كلية تربية؟!!!!
دي أسوأ كلية بتخرج أسوأ ناس في مصر
خريجينها أنصاف متعلمين رغم دخولهم بمجاميع كبيره


على فكرة انا خريج تربية، بس باقول اللي شايفه من واقع تجربتي في الكلية الزبالة دي


السياسه التعليمية من اﻷساس فاشله
فلا تفتش عن قرارات وزارية قبل الهدف من اصلاح المناهج

تحياتي

Noha Saleh يقول...

الاول عاوزين المدرسين يتعلموا

وبعدين نخليهم يعلموا العيال

الكليات كلها عموما مش تربية بس بتطلع كل سنة ناس شايلين شهادات وبس لكن اسألهم كده عن جدول الضرب مثلا مش هتلاقى حد عارف اكتر من حاصل ضرب 5x5

حلم بيعافر يقول...

خلاص يا سواح ممكن نطالب بالغء الكلية واهو توفير وراحة دماغ !!!

ولو اصلحت المناهج وسيبت المدرسين على حالهم بايه يفيد ده؟!!!!

انا شفت من النماذج دى ومن النماذج دى بعينى ...تقريبا مفيش حد بيدخل بمجموع كبير كلية تربية وبيتخرج نصف متعلم...فيه ناس بتدخلب95%...يعنى عندهم قابلية للتعلم اهو

حلم بيعافر يقول...

نهى صالح

انا بقول نهتم بالمعلمين فعلا ونعرف نعدهم ازاى

هو ده قصدى

حلم بيعافر يقول...

ثم انا عايز اعرف حاجة ياجماعة

يعنى عشان مستوى التعليم الجامعى وحش يبقى نزيد الطين بلة وناخد من اصحاب الدبلومات الفنية نعينهم مدرسين؟؟؟...وناخد خريجى كليات تانية غير التربية نعينهم مدرسين؟؟؟!!!

شىء غريب جدا

هو ينفع محاسب يفتح عيادة بعد الضهر عشان يزود دخله بحجة ان الطب عندنا فى مصر محتاج يواكب التطورات العالمية مثلا؟:D

حلم بيعافر يقول...

احنا بنناقش مشكلة حقيقة ومصيبة مرة

نمشى فى الطريق الصحيح ونصلح ولا نفضل ناخد العاطل بالباطل؟!
هو احنا هنعجن ونخبز؟!!!

هو فرن؟!!!

دى التربية والتعليم ياجماعة

ع.سالم يقول...

متفق معاك جدًا.

التعليم يرجع إلى الخلف ... كان بيرجع وبعد الثورة ما يزال.

ربنا يرحمنا برحمته :D

وأحب أشكرك على زيارتك للمدونة :)

وظائف مصرية يقول...

ممتاز جدا ورائع ومقال جميل ...