الثلاثاء، 15 نوفمبر، 2011

المشكلة ان مفيش مشكلة




رايت فيما يرى النائم وخير اللهم اجعله خير قال انا قال اتوظفت اخيرا واشتغلت فى الحكومة وبقى لى دخل ثابت ووظيفة ثابتة وانتهت ايام التشرد والجوع وخلاص الدنيا ابتدت تضحك وخصووووصا ان طبيعة الشغل اللى مسكته لاقى فى نفسى هوى وغرام كبيرين جدا جدا.قال ياكرام ولا يحلى الكلام الا بالصلاة على النبى سيد الانام قال انا قاعد فى مصلحة حكومية كبيرة على الباب عدل فى حتة عالية كده كاشفة كل اللى داخل واللى خارج وجنبى مشنات البيض المعلوسة على اخرها واول مالمح حد اقوم جايب البيضة اسم الله على مقامكم وسافخها فى دماغه.

السعيد لما يسعد بقى يشتغل اكتر حاجة كانت مسببة له الحيرة .دايما والله كنت بسال عن مصدر البيض المكسور على روس المواطنين فور دخولهم المصالح الحكومية .وادينى اشتغلت شوية اهوه وعرفت .

اوعى تفتكر ان البيض فى مصر خلص بعد الثورة .لاء.احنا عندنا عتاقى تسد عين الشمس بعون الله ولسه الوضع القديم قائم على ما كان عليه .مفيش مرة كده اصطدمت باحد القرارت العبقرية اللى اتخذها مسئول معين من كتيبة الافذاذ والعباقرة المرطرطين عندنا وفضلت تشتم وتلعن سنسفيل اللى جابوه وانت خارج مروح؟

وانا فى مركز الشرطة النهاردة بسال عن ميعاد الفرز بتاعى لقيت خلق ربنا كلهم بداوا وانا من اللى مغضوب عليهم.ليه؟؟؟عشان خريج تربية لازم افضل صايع سنة قبل الجيش كده رايح جاى فى الشوارع لا شغلة ولا مشغلة الا المرازية فى البشر .كانت السنة دى زمان موجودة عشان فيه تكليف لخريج التربية بيخرج يشتغل سنة قبل الجيش انما التكليف اتلغى من 13 سنة وفضلت السنة الفراغ دى موجودة .فضلت موجودة ليه بقى؟؟؟...عشان مفيش قلم وورقة وقرار يعدل وضع اصبح ملوش لازمة .

ايام الشريف مبارك على الشيخة ماجدة عفى الله عنهما ^_^ كان فيه خوف من سيطرة الاخوان على نقابة المهندسين فاتفرض عليها حارس .اللى يغيظ بقى ايه؟؟؟ان لما مبارك غار فى ستين داهية الحارس فضل زى ماهو والحارس ماتشالش الا بمظاهرات واعتصامات.طب ليه؟طب موظفين الدولة لازمتهم ايه؟المحافظة على الغلط مثلا؟

خريجى العلوم الكيميائيين المتخصصين اللى زى الفل دول لما يجوا يفتحوا معمل تحاليل لازم دكتور يشرف على المعمل ويقعد فيه مع صاحبه ده حسب القانون.طب يقعد ليه؟يبقى سرنجاتى مثلا -على حد تعبير واحد منهم-ولا يقعد فى المعمل صبى بالسبع سنين اللى خدهم؟.حاجة تغيظ.

المشكلة ان مفيش مشكلة ولما تيجى قدام قرار يفقع ويتقال انت بتنتقد بس مفيش حل تفضل متنح ومسهم.ماهو مفيش مشكلة اصلا .الحكاية ومافيها القرارات الغبية اللى بتطلع عمال على بطال عشان تعكنن ع الناس وكان الحكومة شغلتها انها تعكنن ع النس بس.وخد من الامثلة التلاتة دى كتير واى واحد عنده كتير يقوله فى الموضوع ده لانه وباء منتشر .قرار صح فى حينه او غلط يمر عليه الزمن يصبح مقدس محدش يقدر يهوب منه مع ان البلد كلها بتطلطم بحجارة من تبعاته.


هناك تعليقان (2):

وجع البنفسج يقول...

الحمدلله انه حلم مش حقيقة :)

مشكلة البطالة والشباب المحتاس اللي مش لاقي وظيفة في كل مكان حتى عندنا هنا .. الوضع صعب وكثير خريجي كليات عليا لا يجدون عمل إلا في المخيمات الصيفية كمهرج أو منشط !!

ربنا يصلح الحال يارب .

نور القمر يقول...

شكرا لك استمتعت بالقراءه ..
ان شاء الله خير .. واتمنى الخير لكل الشعوب وشبابااها ..
مع تحياتى
نور