الأربعاء، 30 نوفمبر، 2011

دورك يامواطن-الثورة مستمرة



لما القران الكريم خاطب اليهود بالحجة والبرهان قالهم ايه؟...قالهم(فتمنوا الموت إن كنتم صادقين).الفناء فى سبيل الحق والحرية يجعلك لحمة واحدة انت وهى وبتفضل عايش وخالد وباقى ما بقيت القيمة وخلدت .الصدق الصدق الصدق اللى الشهداء علموهلنا واللى المصابين اصروا عليه وكانوا قاصدينه بالذات ومستعدين يضحوا فى سبيله باى شىء واللى الثوار كلهم خرجوا فى سبيله .جهاد فى سبيل الحق جهاد فى سبيل الحرية .

والد الشعراء فؤاد حداد قالك غير الدم محدش صادق.خلاص بعد الدم ايه ؟...انت بتضحى بحياتك وبتدفع عمرك للى بعدك عشان يقدر يعيش رافع راسه.اظن مفيش انبل ولا اروح ولا احلى من كده.ضمير الامة .ضمير الناس.ضمير الشعب.الشرارة الاولى القليلة الطاهرة الصافية النقية اللى محدش يقدر يشكك فيها غير ابليس وزبانيته وهم كتير اوى الايام دى .

الناس اللى حاطة حيباتها على المحك دى ومصرة على العدل.معندهمش تفاهم .يااما العدل والحق والحرية والخير لكل الناس يااما الشهادة .الناس دى لو مدخلتش الابرلمان تبقى كارثة.ممكن اروح فيها عن نفسى .وعموم الشعب هيعرفوا كده ان اجلا ام عاجلا .

مش طالبين اغلبية فى البرلمان لان بعون الله واحد منهم كفيل انه يوقف بلد من امثال اللاهثين على الكراسى على رجل .ومفيش حجة من حجج الناس التقليدية القدام اللى اتحفظوا بتصمد قدام راى عيل مكملش 18 سنة واقف تحت الغاز والرصاص فى الميادين الحمدلله.

بس الناس دى بتعلق حملاتها الانتخابية كل مايحصل اعتداء على مواطن .مع ان المنافسين لهم جلدهم تخين ومبيحسوش ولو البلد ولعت بجاز اهم حاجة بتكون عندهم المصلحة .مصلحتى فوق الجميع.مبداهم كده.هنعملهم ايه يعنى؟...نفضل قاعدين كده لحاد ماالبرلمان يجى كله ضلالية ومنافقين وتجار دين وتجار فى الام الناس ومواجعهم وتجار فى البلد ومقدراتها؟

من اول مالثورة بدات وانا واخد على نفسى عهد ان اى تحرك سياسى لازم يقابله تحرك شعبى يساند ويؤيد ويسرع من التطبيق.يعنى مثلا قبل قرار حل المجالس المحلية كنا مجرسينهم فى البلد وقبل قرار العزل بتاع الفلول كنا موزعين اسمائهم على الناس وقيلين هما مين واحنا مين .كده يعنى .

الثوار اللى دخلين الانتخابات لازم يتساندوا بالطريقة دى برضه .اللى علقوا حملاتهم عشان الاعتداءات على المصابين وسابوها مخضرة للنصابين لازم احنا نسد مكانهم.فى اتوبيسك فى المترو بتاعك فى القطر لازم تدعو لقوائم الثوار .الثورة مستمرة .انسسسسسسسف حمامك القديم ياجدع .انت مزهقتش من اللت والعجن؟...هرمنا وورمنا وطلعلنا كلاكيع فى دماغنا من كتر اللى مر علينا.

فى الشارع فى البيت يامواطن ادعوا للاحق .عامل ضميرك وبص لمصلحتك حتى قبل كل حاجة .ادى صوتك وادعو للناس اللى فى ايديها خلاصك ومستعدة تضحى باى حاجة فى سبيله .وكفاية ابوس ايدك الوكسة اللى اتوكسناها فى الاستفتاء .

لازم الثوار يبقى لهم رجل فى البرلمان.لازم الضمير ميفضلش مطلق كده معلق فى الهوا .التضحيات بتبذل كل يوم والدم بيراق وبتوع الفتة بيدلسوا ويكوشوا عليها كانهم هما اللى ماتوا .

مينفعش حد يجى يكلمك عن الدين وانت عارف انه ضلالى وبالنظر كده اللى قاعد فى فيلل وعربيات وشقق وبيتجوز كل شهرين مرة ولا اللى بيروح يقف فى البرد على الرصيف يطالب بحقك؟...اللى بيفضل يتكلم ويحشر فى الكلام ويجعلص ولا صاحب الموقف اللى بيقول للغولة ياغولة عينك حمرا؟...اللى كان قاعدج ومستخبى فى البيت ولا اللى طلع وقف قدام المدرعات.

ليه الثورة مستمرة؟

عشان نشوف الناس اللى كانوا معانا فى الميدان.

عشان زهقنا من القوالب .يكونش فاكرينا واقفين فى طابور المدرسة؟

عشان زهقنا من الوصاية الفكرية اللى موجودة فى رؤوس كل قيادات الاحزاب القديمة.

عشان مصر الجديدة.

عشان خلاص مبقاش ياكل معانا شغل النصب وال3 ورقات.

هناك تعليق واحد:

محمد فوزي يقول...

تــحياتي لك
كل الود والتقدير
دمت برضى من الرحمن
لك خالص احترامي

أتمنــــى لك من القلب .. إبداعـــاً يصل بك إلى النجـــوم ..