الثلاثاء، 13 ديسمبر، 2011

ازاى تثبت للحمار انه حمار؟



اطلع بقى ياحماااااااااااااار

بداية ربنا خلق الحمار والكلب والحصان والتعبان وباقى الحيوانات لحكمة معينة .وكل مخلوق له دوره المنوط بيه.وكل مخلوق اتخلق ومعاه ادواته اللى هيشتغل بها ويؤدى دوره من خلالها .الحمار اتخلق معندوش عقل عشان شغلته مش محتاجة عقل.حيوان غلبان مهمته انه يشيل على ضهره ويحط فى المكان اللى صاحبه يقوله عليه .ممكن يتعود على حاجة من كتر ممارستها فيحفظ الطريق من البيت للغيط ومن الغيط للبيت .ممكن يالف صورة صاحبه بعد فترة .ممكن يرفص ممكن يحرن ممكن يبقى هادى وطيب وبيسمع الكلام .كل ده ممكن بس كل ده برضه ملوش علاقة بالعقل .

الا انت عمرك شوفت حمار قبل كده بيسال عن الحمل اللى هيشتاله قبل ما يشتاله على ضهره؟...عمرك شفت حمار وقف فى نص السكة يفكر فى حمارة الجيران؟...عمرك شفت حمار بيقول لصاحبه انه اكتشف طريق جديد ومختصر وبيوفر الوقت والتعب والمجهود؟...ابدا ده مبيحصلش فى الحقيقة .ممكن ممكن يكون حصل فى قصة او مسرحية مع توفيق الحكيم مع يوسف ادريس مع واحد خيالانجى شويتين انما فى الحقيقة لا لا مبيحصلش.

الحمار مبيفكرش وعشان كده مفيش حمار ممكن يثور الحمار بينفذ اوامر وتعليمات فقط انما زيادة عن كده لاء .الثورة دى حكر على المبتكرين ومش كل صاحب عقل ممكن يعمل ثورة لان العقل ساعات بيكون معطل فاضى من البنزين ومبيشتغلش او اصحابه بيكسلوا يشغلوه .محدش يفهم غلط بقى ويقول انى بقول على مجلس الوزرا حمير .

اذن لاغبار على الحمار اللى ربنا خلقه حمار لان دى شغلته .امال الغيظ الشديد اللى جوايا ده مصبوب على مين ؟...على الحمير اللى ربنا خلقهم بشر واختاروا يبقوا حمير وهنا ممكن استعير التصوير القرآنى عشان اوضح الصورة ...(مثل الذين حملوا التوراة ثم لم يحملوها كمثل الحمار يحمل أسفارا) سورة الجمعة الاية 5

المعنى واضح ومن غير احراج بقفى ده قران.اللى يهمل امانة ربنا محملهاله ده عبارة عن حمار او زى الحمار .ان كان بقى كتاب مقدس ربنا بعتهوله او قدرة ربنا منحاله وميزه بها عن باقى الخلق.

طيب ده اتفاق ان فيه حمير وده اتفاق برضه انها مش نظرة استعلائية من الناس اللى بيقولوا ان بينا حمير .دى مشكلة ولازم لها علاج وعلاج ناجز وسريع .ليه بقى؟...لانها معدية جدا واللى معطل دماغه ده وحاسس انه مستريح بينقل العدوى لاخوه او قريبه او صاحبه.

مفيش شك ان المحاولة متعبة وان النتيجة فى الوقت الراهن محبطة ولكن الامل فى الله واحنا كنا فين وبقينا فين .بس اللى انا عايز احذر منه محاولى العلاج ومروجى تشغيل العقل انهم ممكن يتعدوا هما نفسهم وممكن يتشتموا ويتضربوا والعيال تجرى وراهم فى الشارع ويحدفوهم بالطوب ويقولوا المجانين اهم المجانين اهم.
الشىء اللى يغيظ هو وجود ناس بتعترض على وصف الناس بالحمير او بالغباوة .اذا كان ده تصوير قرانى لجماعة فرطوا فيما اتاهم الله فحاجة وحشة اننا نتكسف من الوصف الطبيعى للحالة وده طبعا طريق بعيد جدا عن طريق العلاج.

طيب...هنقسم المجتمع لحمير ولمعالجين يعنى؟...لاء لا تقسيم ولا حاجة بس دى حالة لازم نتعامل معاها كويس ومتشوفش حد قدامك رافض يشغل دماغه الا وتحضصه على تشغيلها لانى التنازل عن شىء ربنا اداهولنا ده يعتبر اثم وانت مؤمن يامواطن وتحب انك تغير الاثم على حسب ما تقدر.

وتاكد يامواطن ان اولئك الذين يهيئون للحمير المناخ للاستمرار فى كونهم حميرا ماهم الا اشرار يجب عليك محاربتهم . 

الموضوع كبير كبير كبير ومش حكر على تيار دون تيار .البلاء عام ..النهارده بتكلم مع شاب حليوة عايز يطبق الشريعة من غير ما قرا كتاب واحد فى التفسير ولا فى السنة ولا فى الفقه ولا فى اى حاجة خلقها ربنا .اضعف الايمان مثلا انه يبقى عارف اسماء الصحابة مش عارف غير قلة اتعود يسمعهم من امام الجامع .مش عارف عن التاريخ الاسلامى ولا حاجة .ابيض ياورد ...

كل واحد له حق ينتخب اللى هو عايزه بس انا عن نفسى ازعل اوى لو واحد غيب عقله واستسهل واخد الكلام على عواهنه واستسلم لكونه حمار .وعلى فكرة لقد كنت حمار فى يوم من الايام برضك وللعلم حموريتى مكنتش تصديقى المطلق لشيخ من الشيخ وكانت خلاف ذلك تماما يعنى الاستغلال مش من الاسلاميين بس.

عزيزى المواطن حاول الا تكون حمار بعد الان واذا نجحت فى النجاة بنفسك حاول تشد معاك حمار تانى ومش مهم تقنعه انه حمار خده باللين واحدة واحدة لبر النجاة داخوك برضه يااخى.

هناك تعليق واحد:

ستيتة حسب الله الحمش يقول...

أنا إتلخبطت
لأن لو الحمار حمار يبقى مفيش فايدة في انك تنصحه
ولو مش حمار بس مستحمر او حد مستحمره
هنا فيه أمل
سعدت بوجودي حداك
تحياتي