الأربعاء، 28 ديسمبر، 2011

كلب الجيران


مصالح هى السياسة ياعزيزى المواطن .لعبة قذرة اطرافها مستعدون دائما لدهس الجماهير بالاحذية عقب ضمان الاصوات فى الصناديق مباشرة .الاطراف جميعا ولا استثنى احدا الا من رحم ربى من الرجال الذين صدقوه ماعاهدوه عليه فمنهم من قضى نحبه ومنهم من ينتظر.الشهداء ياعزيزى المواطن .الاحياء مجازا والاحياء اجسادا.الذين قدموا اجسادهم على مذابح الحرية من اجل سواد عيونك وعيون اولادك واحفادك وقبل منهم الله ماقدموه.والذين يقدمون اجسادهم على نفس المذبح كل يوم ولم يخترهم الله الى جواره بعد.

الدنيا مصالح هى الاخرى وقد كتبت ذلك هنا فى نفس المكان وان كانت الكتابة ساخرة .الان لا مجال للسخرية احسن اديك بالبوكس فى مناخيرك.اهدى كده وصلى ع النبى.

لن اطالبك بتقمص دور دون كيشوت .انت حر شجع من شئت وسر وراء من تحب وتقدم وامسك بزمام امور من تحب كذلك .العب واكسب واخسر وادخل فىصفقات واعقد ماحلا لك ان تعقده منها وعش وتمتع بمكاسبك واتبسط وخليك ميت فل وعشرة ومتحرمش نفسك من اى حاجة .ولكن تذكر يا مواطن انك قبل ان تدخل الى عالم السياسة فى الاصل انسان .

انسان ايا انسان ما اجهلك
ما اتفهك فى الكون وما اضالك
شمس وقمر وسدوموملايين النجوم
وفاكرها ياموهوم مخلوقة لك؟!
عجبى!!

اظن الضمير الجمعى فى مجتمعك بيقول ان الدنيا فانية وانك موافق رباعية صلاح جاهين واظنك عارف التصوير القرآنى(خلق الإنسان فى كبد).انت اساسا مواطن غريب عارف كل حاجة وبتستهبل .سبحان اللى بيصبرنى عليك.

من فترة اعرضت عن الخوض فى احد النقاشات حول مرشح من مرشحى الرئاسة لانى بكل صراحة نفسى تعافه جدا واشمئز منه على الاخر.ليه اشمئز واقرف وهو خلقة ربنا؟...عشان هو مبيعملش باللى قال بيه ربنا وضرنى ضرر شديد وجاى دللوقتى عايز يبوسنى من بؤى.اوعى حد يضحك عليك ويجى يبوسك من بؤك.

ومن هنا اقر انا الاستاذ الممتاز صاحب الكرامة والاعجاز/محمد التميمى عبده احمد عبدالحق انى لم ولن ارشح كلبا للولاية على الناس ابدا.

واحب ان اوضح منعا للبس ايهم تنطبق عليه مواصفات الكلب الذى ان تتركه يلهث وان تحمل عليه يلهث وايهم طيب وابن حلال ومؤدب اوى ولطيف.

بص ياسيدى وماسيدك الا انا.اريدك ان تمشى فى هذه الايام وبيدك مصفاة .ايوه صدقنى ولاد الحرام مخلوش لولاد الحرام التانيين حاجة.

قلت له يا  يابنى بعيدا عن السياسة كوووون انسان على راى والد الشعراء فؤاد حداد.خليك مع الحق والخير والحرية والقيم النبيلة دى قبل ما تعمل حساباتك ردى عليا وقالى-وانا  ابن خالته الصغير-انا اكتشفت ان فهمك بطىء.

والله انا فهمى بطىء فعلا اللى سايبلكو المدونة كده ع البحرى من غير ما بضغط على حد ياخد مشاريب.والله لو ماجابت همها لاقلبها مسمط.عايزين نتجوز الله يخربيتكو.

الخلاف حاليا مش على سياسة .الخلاف على الناس والوقوف جنبهم.الخلاف فى مين معانا ومين علينا .انا عن نفسى فى انتخابات مجلس الشعب هدى صوتى لقايمة الثورة مستمرة ودى فيها اخوان وسلفيين وليبراليين واشتراكيين .فيها كل الاتجاهات يعنى صوتى مش هيروح لفصيل سياسى معين انما هيروح لفئة من الناس شايفها انها مع الشارع وبتطالب بمطالب انسانية مستحقة .

وصوووووتى فى انتخابات الرئاسة رغم انى احتمال كبير اديه للراجل الاقرح ابونضارة ده اللى اسمه البرادعى الا انى كان نفسى اديه لايمن نور وعبدالمنعم ابو الفتوح وحمدين صباحى مع ان الاربعة سمك لبن تمر هندى فى السياسة .بس هما دول اللى مع الناس .

كان اولى بى انى اروح ادورلى على حزب اشتراكى انتمى ليه وانى ادى صوتى لحمدين صباحى بس احنا فى فترة يلزم فيها الوقوف على الجزر المشتركة والتنازل عن الانتماءات السياسية لصالح الناس.لصالح الشارع.لصالح الشعب.لصالح هيصة^_^

واوعى تصدق اى كلام .متبقاش هوائى .ليس كل من يتغنى فى ليلى ملوحا يا مواطن.عندك مثلا الدقون بيتكلموا على حرمة الدم ولما الناس بتنداس بالمدرعات وبتتهرس تحت الجنازير بيساندوا السواق والمجلس العسكرى.ياريتهم كانوا عملوا عمى.مشيوا ورا كرسى وعملوا حسابات برضه وطنشوا الارض والعرض والدم...دول مش مع الحق ولا مع العدل ولا مع الخير ولا مع الحرية.

متجيش بقى يامواطن تايد كائن ظلامى واجى اقولك خليك مع الحرية تقولى انت معاها.لاء انت كده مشوش .انت حر ودى ارادتك بس انا كده هزعل منك وانا زعلى وحش .ده مهما كان كلب من كلاب الحراسة يااخى وانت مواطن زى الفل اى مواطنة تتمناك.

وعلى راى الاخوة اياهم الحق ابلج والباطل لجلج.الحق دايم حق واضح زى نور الشمس صافى زى عيون البنت اللى وقعتنى على بوزى.وانا من مكانى هذا لا يسعنى الا انى اقولها قصيدة اخونا اللمبى ...الحب الحب الشوق الشوق مشتاق مشتاق^_^

كلب الجيران شغلته الهوهوة فقط يامواطن.يعنى لو رشح نفسه للانتخابات اوعى تديله لمجرد انك تتقى شره او لانه بيعملك باباى او بيهوهولك اكتر من كل صحابك.ده فى النهاية كلب ومش فاهم احنا عايزين ايه.تفكير تانى خالص والله.

فى النهاية احب اشكر رجالة الطوابرة شكر شديد اووووووووووى واقولهم الحشيش بتاعكو الليلة دى عامل احلى شغل.

هناك 7 تعليقات:

محمد فوزى يقول...

تدوينة رائعة جدا

مع تمنياتى بدوام التوفيق ان شاء الله

شمس النهار يقول...

ولهم مني مزيد الشكر
:))))

تدوينة دماغ عالية جداااااااا
:))))

بس بطل تجيب سيرتي علشان ماارفعش عليك قضية
:))))
كام شمس في البوست
:)))

بس منين صلي علي النبي وبوكس في مناخير اللي قصادك
:)))

البرادعي دماغه عالية واضح انه كان معاك:))
وماحدش فاهمه صحيح هو جه تحداهم في العلن وفي عز هيلمان مبارك
والوحيد اللي كلامه مااتغيرش
بس اغلب المصريين مش بيحبوا النوع ده
همه عايزين الزناتي خليفة(بتاع مدرسة المشاغبين) اللي يجعجع ومابيعملش حاجة
القبيلة كلها عندي انتخبت الثورة مستمرة صحيح مااخدوش اي مقعد في ديرتنا بس علي الاقل اقابل ربنا ماانتخبتش اي حد ضحك عليا
علي الاقل دول اللي طلعوا وقالوا لا طلعوا من الشعب للشعب صحيح الشعب بعد كده خزلهم بس هو ده شعب مصر
تحية للبوست
وللطوايرة
:))

حلم بيعافر يقول...

محمد فوزى

انت الاروع يا زعيم

نورت

حلم بيعافر يقول...

شمس النهار

هى شمسس واحدة ومراقبانى كمان:D


بلاش تجيبى سيرة الطوابرة ...البلوج نفسه خاف من تعليقك ومرضاش ينشره غير لما قاللى:D

نورت

اخبار الرياضة يقول...

؟؟؟؟؟؟؟؟؟

Umzug Wien يقول...

الترجمة من فضلك ....

حلم بيعافر يقول...

حاضر

المرة الجاية هكتب باليابانى:D