الجمعة، 16 ديسمبر، 2011

آخر شهداء(الدين المعاملة)



لو كل رجال الدين شبهك يامولانا مكناش سكتنا على نظام مبارك لدللوقتى .مكناش اندهسنا تحت عجل المدرعات فى ماسبير زى الصراصير والسحالى مكناش اتضربن بالنار فى عنينا ومكناش سكتنا على كشف العذرية لاشرف بنات فى مصر ومكناش اتقتلنا فى محمد محمود والقصر العينى ومجلس الوزرا ومكناش فضلنا نتضرب على مدى شهور ومكناش سكتنا على قتل جنودنا ع الحدود ومكناش سلمنا رقابينا لشوية عاهات واوساخ وعجززنا نعمل حاجة .

مطلوب مننا ايه يعنى يا سياسين ياكبار؟..نطلع نموت يعنى؟..نطلع صور فى برامج التلفزيون والناس تمصمص شفايفها علينا؟...نتحول من لحم ودم لصور بروفايلات الفيس بوك؟....نبقى رقم فى المشرحة ومحاضر الشرطة وقوايم الشرف؟..نتنازل عن اعمارنا عشان تقعدوا وتنجعصوا فى البرلمان؟...

يافضيلة المرشد..يا مشايخ السلفيين ...ياللى الناس ادتكو 3/4 البرلمان متعرفوش تحفظوا الدم ده؟...متعرفوش تطبقوا تعاليم الاسلام عن حرمة الدم؟...متعرفوش تبقوا بنى ادمين وتتكلموا؟...متعرفوش تصرحوا ولو تصريح صغير فيه ريحة الدم؟...متعرفوش تطلعوا تعلقوا مشاركتكوا فى الانتخابات؟..الموضوع كان هياخد منكو وقت قد ايه يعنى؟

اشمعنه كل مرة يموت واحد فى خامسة طب ولا شيخ ازهرى كل حياته العلم؟..يابتوع السياسة يابتوع الدين والسياسة يابتوع تطبيق الشريعة اللى كان مع المصابين النهارده والشهداء واحد زى العلمانى الماسونى الكافر عمرو حمزاوى ...لو الكفر كده فانا كافر وماسونى وعلمانى واتشرف كمان يادقون ومرايل ع الفاضى.

اشمعنى احنا اللى ندفع يعنى واللى يحصد  الكتلة والحرية والعدالة والنو والوفد والفلول؟...اشمعنه يعنى الشهدا مفيهومش حد زى حازم شومان ولا مفيهومش نجيب ساويرس مثلا؟!

هناك تعليق واحد:

شمس النهار يقول...

كل مااشوف الصورة دي
احسن انه بيبتسم لنا وبيقول للمجلس انتم قتلتوني بس انا اللي هنتصر
ان شاء الله