السبت، 31 ديسمبر، 2011

خبى نفسك






خبى نفسك
لا يصاب غيرى بهذا
ادى كل الكون اجازة
من الجمال
امنعى فرص الاصابة
كلنا قصادك غلابة
نسا ورجال
امنعى فرص الاصابة
واقتلى اى احتمال
اطلعى فوق فى السما
بس خلى قلوبنا دايما ياحبيبتى
على اتصال
ارقصى فوق ع النجوم
المسى بنظرة الغيوم
تشتى عطر وتشتى ورد
يادفا يمحى فى ضلوعى
اى برد
اى حد كبير صغير
يرمى لعيونك سلام
اوعى تدى  اى  رد
خبى نفسك
مش طبيعى ان القمر
ينزل ويمشى بدون حجاب
انت مين وهما مين؟
وايش جاب لجاب؟
هما اهل الارض
وانت
 طايرة فى السحاب
هما توهة وهما غرقة
وانت غاية
انت اية
 وانت فصلُُ للخطاب

خبى نفسك
جوه قلبى فيه وسع
جوه مذنب
جوه خاطى
ناله حبك م الضياع
ثم ثم دافع ثم قاضى
ثم ياحبيبتى شفع
خبى نفسك م العيون
وخبى روحى من الوجع
ده قدر
والقدر وافى  ووقع
لك توبين يابن التميمى
توب بياضه من اللى يفرح
وتوب حزين
مليان بقع
يااااما سقف الكون نقع
فوق دماغى هموم ومر
كنت اقول سكت خلاص
يرجع يخر
كنت اخطى للامام
تتحسب للخلف در
 وتلومينى على الحصار؟
انا المحاصِر فى القيود
والمحاصَر جوه حصنه طليق وحر
هل يجوز البحر يزعل
من غريق رفض النجاة
رفض انه يرجع للشطوط
او يفكر يوم فى بر؟
ياللى توبك توب بياض
والنبى بالله عليكى اخبرينى
لو نطقت بسحر حبك مااستحيش؟
وابقى خنتك لو رفاق الدرب راحوا
استشهدوا وسابونى اعيش؟
ابقى جوه عنيكى عيل ولا راجل؟
ابقى حاجة ولا ياحبيبتى مفيش؟
خبى نفسك جوه قلبى من القنابل
خبى نفسك متخافيش
لاجلك انت
اى خاين اى كافر اى ندل
يتقلب ويكون مناضل

دهسوا ياحبيبتى الجناين
كل وردة كان قصادها بندقية
كل بلبل كان قصاده اقله حية
كل غنوة فى المداهمة دى ضحية
فى المداهمة الصدق تهمة
والوطن ملعون ابوه حب الوطن
ومهوش عبادة
لما نتداس بالبيادة
نبقى غرب
لا لينا اهل ولا سكن
فى المداهمة الكل ساهم
المساهمة بالسكوت
والصلاة للقبح وروايح العفن
والقنوط للابالسة
والموالسة
والتفنن فى العبادة
للوثن تلو الوثن
وفى المحاكمة
لما تتسرسب حقوقنا
جلسة جلسة
لما يتسحلوا الصبايا فى الشوارع
والدقون مكتومة خرسا
لما يرمونا جثث فوق الزبالة
والكلاب تطلع تهوهو
وتقول يابورصة
لما دمنا يبقى ميه
والحجارة فناها كارثة
يبقى ده معقول وعادل؟
ابقى انا فى عنيكى راجل؟
ولا بعتك بالنجا وبعت القضية؟
شوفى مين قاسى ودفع
شوفى مين اللى انتفع
ياللى توبك توب بياض
اللى مات الشيخ عماد
اجيب منين يارب وعى؟
كل يوم نطلع بنعى؟
كل يوم يهجر ولى
ويسيبنا واحد م التقاة
والبهايم نازلة رعى
خبى نفسك ياحبيبتى من لظى الكهان ونارهم
اى شىء ناصع وزاهى
استثارهم
خبى نفسك ياحبيبتى
ليك مسارك غير مسارهم
انت جنة وهما نار
هما غربة هما تربة
وانت راحة ياحبيبتى وانت دار
الجمال هو شرعك
وفى شرعهم ياحبيبتى عار
خبى نفسك م العساكر
ومن المغول ومن التتار
خبى نفسك لسه فيه بينهم هولاكو
لو عليا كل طلعة شمس
ابنى ميت جدار
خبى نفسك جوه قلبى
لو طالوكى هيبقى ذنبى
بعدها هلاقى اليقين؟

هناك 11 تعليقًا:

عباس ابن فرناس يقول...

اما انا فاعتقد انك ..... ابدعت

تحياتى المستعطرة

وعام سعيد

عباس ابن فرناس يقول...

عفواً !!!

انا لم اكن اقصد الاساه اوحتى الاستخفاف بالموضوع مطلقاً !!
فقط وبكل جدية كنت اريد ان اعبر عن وجهة نظرى وربما خانتنى الالفاظ او العبارات اوحتى الافكار التى اعتقدت انها ربما تكون مناسبة للموضوع

ارجو منك ان تقبل اعتزارى واسفى الشديد

فلسطينيه يقول...

تبقى في عنيها راجل..
تبقى في عنيها راجل ..
:)

حلم بيعافر يقول...

عباس

ميهمكش ياعباس

شرفتنا

حلم بيعافر يقول...

فلسطينية

انت هتكملى القصيدة ولا ايه؟:D

شمس النهار يقول...

وعجبي
:))
كل سنة وانت طيب وعااااااام سعيد

حلم بيعافر يقول...

شمس النهار

اهى دى بقى للشمس بتاعتى:D

Umzug Wien يقول...

شكراً على الموضوع

غير معرف يقول...

How to unlock your phone for free
[url=http://www.youtube.com/watch?v=sQpRPPQ5y6s]Unlock Nokia 3606[/url]
[url=http://www.youtube.com/watch?v=p2N7FMzNNv8]Unlock Nokia 6210 Navigator[/url]
[url=http://www.youtube.com/watch?v=mIgnwU6ovlw]Unlock Nokia 3711[/url]

غير معرف يقول...

A lot of quality articles i see on your www.blogger.com
[url=http://www.youtube.com/watch?v=GKzjJKI46RQ] Unlock Nokia 7900 Prism[/url]
[url=http://www.youtube.com/watch?v=d5ZF1n3iUM4] Unlock Nokia 7510[/url]
[url=http://www.youtube.com/watch?v=hllZaT7ZIcw] Unlock Nokia 6600 Slide[/url]

غير معرف يقول...

www.blogger.com gives me so much fun, thanks

[url=http://topbettingtips.tumblr.com]click here[/url]