الجمعة، 27 يناير، 2012

أغانى للميدان



من مظاهرات المنصورة


كنت هسمى كل اغنية باسم الشخص اللى كان فى بالى وقت كتابتها بس سيبت الحرية للقارىْ هو وخياله...


للميدان الذى منحنى الكثير وعلمنى الكثير مما لم أكن أعلم ...



دين

ازاى ارد الدين؟
ازاى اعدى جنبك ماانحنيش
ازاى اطير
ازاى ابدل ربطتى ف الارض
بجناح وريش؟
ازاى تموت وازاى انا بعدك اعيش؟
ازاى ارد الدين
وانا كل مالى فى الحياة
بعدك مفيش
يازارع الاسفلت حنية وغضب
يامحرر الحلم المستباح
يامنقذ الفرح
اللى كان يوماتى مغتصب
الحق صعب
واللى يختاره سكة
يتهد حيله من التعب
ازاى اكمل واشد عودى
زى عودك قدام لظاهم
لما عافر وانتصب؟
دمك؟
ولا الخيال والوهم طافى على الورق؟
قصيدة باهتة؟
ولا قميص غرقان عرق؟
بين ده وده
حاجات بتطلع فى السما
سابع سما
وحاجات بتذوى وتتحرق
كل الحناجر والمولودين شايلين طبل
ايشى بهلوان
وايشى مداحين
وايشى نخاسين بالناس تتاجر
كل الاناجر والاكالين
والشاربين لحمك ودمككل المعابر والعابرين فوقك وفوقنا
كل دول قبضوا التمن
وانت الوحيد اللى دفعت
ازاى ارد الدين
وانا على رفع راسى فى حضورك
ما استطعت


البهلوان

تعالى قرب بص شوف البهلوان
رغم كرشه قدر ينط
اصبح مناضل
ماهو ده اللى فااضل
من فار لقط
نط النطة
خلع البدلة والجرافتة
ونزل ع الشارع
انا انا انا اول داعى
كسروا رقبتى وعضوا صباعى
ولولايا عليكو ياحلوين
بصوا لوشى
انا شكلى رفاعى
وهخلصكوا من التعابين
خبرة عظيمة مقاتل واعى
انا دافع حتى بالدم
وصورتى اهيه
كنت شهيد فى 73
حد عصامى طالع السلم سنة بسنة
اوعى تزايد ياض ياحقود
شايفك شايفك
بس استنى
كنت بتخبص فين ياحبيبى
وانا بتصور ع الدبابة
بص ياهذا الشعب شوية
انا عارف اغلبكو غلابة
واتعذبتوا كتير فى حياتكو
انا مبعوث الرحمة اليكو
انا بعشقكوا
وانتوا كمان
بتهيالى انكو واقعين
فى هوايا صبابة صبابة صبابة

وانا مش باشا
دانا طالع من تحت جاموسة
وانا عارف كلكوا حابنى
عندا فى القلة المدسوسة
باكل نفس الاكل بتاعكو
لسه امبارح لاقى فى الفول
 يجى ميت سوسة
ولادكو ولادى
وولادى ولادكو
عندى شلاطة وزقلة اولاد
عندى بنات ناعسة ونفوسة

وانت ياشعب فى حاجة اليا
زى مااكون انا فارس
وانت ولية
وبتتنشق على ريحى
وبتتمنى منى النظرة
تبعد عنى
خيبة قوية
لو تختارنى يبقى يبقى ياسعدك
ترجع مصر
اما للامة العربية

دقق بس وهتلاقى
ان بدلكم محتاجة ادارة
وانا بلافخر
كفحتى اصيل
كفاءة
جدارة
عميد الوزرا وكابتنهم
من غير علامات او ميزة وشارة
وعملى
وشاب صغنن
مش كلاسيكى
كاجول كاجول
ولبسى يا شعب
تارة تيشرت
وبلوفر تارة



الطبال

قالك ايه؟
الطبال مش راضى يطبل للثوار
قالك ايه؟
بين ليلة ويوم
بين صحو ونوم
قالك عينه بتطق شرار
قالك لاء
هيقول المرة دى الحق
قالك ايه؟
قالك فار وطلع م الشق
قالك دمه دم البق
قالك قالك هههاو
هيقول المرة دى الحق
قالك اصله صعيب القول
قالك ايه؟
عرض وجتة ونفخة وطول
بدلة نضيفة تقولشى هتلمع؟
وصاحبها يدوبك...
بُق ف بُق
قالك ايه؟
قالك تار
اصلها زار
واجدع واحد اللى يدق

قالك رق
ارحم ياللى اتحجر قلبك
كان طيار دافع عنك
حتى ان مص ياراجل دمك
ممكن ترحم
قالك ايه؟
قاللك اهدى شوية ياعيل
روح بيتكو بقى واتجأ
خللى العجلة شوية تدور
خللى العتمة تروح وتغور


هنقول ايه؟
هو انا يعنى مسكت عجلتك؟
هو انا يعنى حجزت النور؟
هو انا يعنى بنيتلك سور؟
هو انا يعنى سلبت كرامتك؟
هو انا يعنى حنيتلك قامتك؟
ولا كسرت عنيك يااخينا؟
ولا ضربت عليك النار؟
طبل زى ماكنت زمان
والبس توب العقل بزور
هى غريبة عليك وعليهم؟
كلكع كلكع وارمى كلام
واسال قبل ماترمى الكلمة
سعرها كام؟
السوق التغير
واتغير تمن الكلاكيع
كنت بترمى كلام بيلزق
كنت بتحزء وانت بتمدح
كنت صغير
اما الان
فاحذر احذر
طول دقنك بعض الشىء
وان شفت الكروان بيغنى
هد الدنيا
اقلبها حريق
نام ياحبيبى على التأييد
واصحى اتملى على غيار ريق



غراب البين

ياغراب البين
ياما بين وما بين
ما جعل الله لنا قلبين
انت عاش الملك انت الملكى
وان هبت ثورة انت جيفارا؟
على كل الالوان بتغنى
مش كنت خليل السلطان؟
مش كانت على كتفك شارة؟
مش كانت رجلك على رجلك
وبتحرق دمنا بسيجارة؟
ايه جد يااغا ايه اتغير؟
ادينا امارة
نفسك تركب فوق النصر؟
نفسك يبقى قدام اسمك...
(حاكم مصر)؟
من كام يوم
كان فيه ثورة
بتعرف تكتب؟
اكتب ثورة
واتهجى الكلمة بالراحة
اتهجى الكلمة بشويش
كان فيه ناس وحكومة وجيش
كان فيه بلاط وكلاب تتمسح
كان فيه ميدان الناس له تنزح
كان فيه ثورة
هدمت قصر وكشفت عورة
كان فيه مصر
ضربوا عليها النار مماتش
قامت واقفة
واقفة صبية
واقفة نبية
هزمت كل جنود ابليس
بنظرة ورمش
وقف العالم ذاهل ساكت متكلمش
شاف الحلم المطعون صامد
مااستسلمش
يبقى حمار يااخينا وجاهل
مااتعلمش
اللى يفكر اننا ممكن نرجع خطوة
اصل الخوف مبقاش له سطوة
واحنا الحاكم فوق اراضينا
فوق يااتخينا بتعرف تكتب؟
اكتب دم
اكتب جرحنا لن يتلم
الا ان خدنا بتار الشهدا
الا ان ناموا النومة فى راحة
اصل الارض الثايرة لا يمكن تهدى
لملم خطبك يللا بسرعة
لاهو وقتك
ولا وقت مناهدة



الحق

الحق بذرة لابد تطرح
ميهمهاش نار العطش
ميهمهاش الارض بور
الحق نور
الحق سيف حامى وجسور
يقطع ويدبح
الحق باين مهما استبدوا
الحق بانى مهما هدوا
دور كده بين السطور
مابين خطابات العسس
هتلاقى كلمة بتنتفض
بتحرضك انك تثور
الحق غنوة
تبدأ بصرخة او بهمس
حتما لابد هتندلع
الحق شمس
متكونش اعمى
افتح عنيك وانظر وشوف
مبقاش فيه خوف
الخوف ده احنا بنصنعه
تمثال بنفضل نعبده ونقلده
ياكيان مطاطى
ياصوت ياواطى
معرفكش
اخلع عبايتك عنى
مش هنحنى
ولا ركبى ركب اللى انحنى
قرب ياحلم
والمسنى لمسة معلنة
انا انتصرت


طلة شهيد

لابد من طلة شهيد
كى نستعيدك ياوطن
لو كنت يابكرة بعيد
هنشد بادينا الزمن
ياللى انت فوق ضهرك صليب
وبتدى من دمك تمن
اسمى فى دمى
مش ع ايفط وسط الشوارع
اسمك فى دمى
وفوق جبين الصبح طالع
اوعاك تغيب
موتك حضور ومهوش غياب
ولك نصيب
اكبر نصيب

اوعاك تغيب
وان غيبت قول ان نت راجع
لابد كان دمك يفيض
كى نكتشف معنى الطهارة
تنفض اسواق العبيد
تزوى الوشوش المستعارة

لابد من طلة شهيد
عشان نفض المسرحية
عشان ضمايرنا اللى نامت
تنتفض
تترد حية
وتقوم تقابل كل حق ومتستحيش
ماهى ياما جرحتها الحقيقة
وياما رجعت مستحية

لابد من طلة شهيد
كى يتولد الكون ولادة
لابد من طلة شهيد
وهى فينا الطلة عادة
اتاخرتشى علينا مرة؟
قطعها شىء؟
احنا عيال الله
على مذبحه نقدم شهادة
دينا كده
فاهمينه كده
وهو ده لب العبادة



لايق عليك الامل

لايق عليك الامل
ياواد يامتعافى
فردت جسر الخلاص
ومشيت عليه حافى

النت قلب الحديد
وكسرت عين الرصاص
لا نبض قلبك وقف
ولا نور عنيك طافى

لايق عليك الامل
ياواد يامتعافى
انت الوحيد اللى حر
قصاد سقوف واطية
انت الوحيد اللى حق
قدام زخم زائف
مال اللى ميل وانحنى
وانت ما ملت
زى الجبل
حتى ان وقت
واقع اسد
واقع واقف


لايق عليك الامل
ياواد يامتعافى
يا عزيز ياحر الدم
شر الدواب الاصم
الحاملين الاناجر
الحالمين بالفتة
البايعين ف لحم الميت
بالكوم وبالحتة

لايق عليك الامل
ياواد يامتعافى
شايف ياواد المستخبى
شايف جميع اللى خافى
لايك عليك الامل
نظرك حديد فى حديد
ماشالش منه الرصاص
بالعكس بيه اكتمل


اللى حاصل

اللى حاصل يابلد
ان فيه فار فى العرين
فار وحل مكان اسد
بيعاندنا
نقول شمال
فيقول يمين
بيراودنا ع الركوع
ويطالبنا بالركوع
فكره لما يدوس علينا
يبقى لازم م الادب
نتكتم ونقول آمين


طبيب

لو كنت تعرف تساوم
لو كنت تعرف تبيع
لو كنت تعرف تبادل
مكنش ده حالك
ولا كنت تبقى مناضل
كانت الرصاصة اتلخبطت

اصل الحكاية ومافيها
لكل شىء تمن
لازم يكون عادل
ومفيش شفا من غير الم

وانت طبيب
جسم الوطن مليان دمامل
وانت طبيب
مين يشفى غيرك؟
الحرامى؟
اللى كل مافيه بيشهد انه جاهل؟
اه بكينا
واترمينا ف حضن بعض
بس برضه الجرح صعب




ارجع

لاتقاتلْ
لف وارجع
هو اللى نايم منك اجدع؟
لاتقاتلْ
وكنبتك ابقى من الميدان
ولا هو ضرورى يعنى تموت عشان
حد سو ميستاهلش؟
هو يقبض
وانت طول العمر تدفع
لا تقاتل يابنى واسمع
هما حصادين مغانم
وانت مدفع
هما لذة وانتخة
وانت جرح كبير بيوجع


لاتقاتلْ
الشجاعة مضرة جدا
كون جبان
تكسب كراسى وتنجعص
فشر الملوك فى البرلمان
وحبذا لو رقصوك
الرقص لحساب الملوك
كله فايدة وخير كمان


لا تقاتلْ
الهتاف الحر باير
بدله حالا بطبلة
يا ولد غضبان وثاير
دنيتك دى دنيا هبلة
اهبش مع التيار وبيع
او ارتضى دوام الخساير

لا تقاتلْ
انت حق وهما باطل
بس مين هو الحكم؟!
الحكم عسكر غبى
زى سلفه
بيدوس عليك بالدبابات
زى ماتكون اجنبى
الحكم عسكر وماطل فى الحقوق
الحكم حية ولازم
ترجع ذليلة للشقوق

هناك 6 تعليقات:

فلسطينيه يقول...

أغاني رائعة..

وصف من شدة روعته لا "يُعلق" ولا "يُرد" عليه!

رائع و متألق كالعاده ايها التاريخ العظيم

:D

حلم بيعافر يقول...

شهادة مجروحة ايتها الشريكة الغالية

هايزين حد محايد

:D

محمد فوزي يقول...

رااااااااااااااااائعة جدا

Umzug Wien يقول...

اللهم احمى مصر واهلها

حلم بيعافر يقول...

محمد فوزى

جميل انها عجبتك

نورتنا

حلم بيعافر يقول...

اززززززز