السبت، 4 فبراير، 2012

الوسخ وسخ




كلٌ يخرب بطريقته الخاصة .فى عهد السادات النموذج اللى انتشر من الرجال كان الهباش اللى  يقولك التجارة شطارة مهما كانت المحرمات وعليه اصبح لافيه اخلاق ولا دين فى عهد رئيسه لقب بالرئيس المؤمن واتفشخ الغلابة فشخ بين وارتفع الحرامية والشطار ارتفاع مذهل وخسرت مصر جزء كبير من اخلاقها واصالتها ...الخسارة اللى علماء الاجتماع اتمنوها طارئة بس للاسف كانت دايمة لحد ماوصلت للعصر السعيد ده وزاد فوقها طبقة تانية من الخسارة.

فى عهد مبارك او فى اواخر عهده بالتحديد كان ولا يزال النموذج المنتشر هو الراجل الحرك اللون المودرن اللى بيشترىة السلطة بالمال .كتير جدا من الحرمية اللى تلتلوا على قلبهم من قوت الغلابة اللى طافحين الكوتة والدم لما حس ان البساط بيتسحب من تحت رجله والزمن بقى غير الزمن قرر يشترى السلطة ويوغل فيها الحصول عليها حتى اخر نفس من انفاس الشعب ...وكتير من النصابين قدر يضحك على الحاشية الرئاسية ويوصل بتمن قليل او من غير مايدفع مليم حتى ولكم فى الطبال عبرة يا اولى الالباب.

واصبح كبارات البلد انصاف رجال مابين حرامية ونصابين وارجعوا بالذاكرة وشوف مين كان بيحكم مصر فى الفترة الاخيرة ...واذاا كان رب البيت بالف ضارب فسيمة اهل البيت كلهم الرقص ...تصرفات الناس فى الشارع كانت ولا تزال تبعث على الجنون لانهم قلبوا القيم الاجتماعية والتعاليم السماوية قلبة سودة لصالح ناس ملهمش دعوة بيهم نهائى لا فى الماضى ولا فى الحاضر ولا فى المستقبل.

في انتخابات 2011 روحت احط صوتى مرة من نفسى يعنى قبل مااموت من غير مااحطه فى الصندوق بايدى انا لقيتنى برضه اتاخرت والصوت اتحطلى جيت اقول لاء وكده تزوير وعايز محضر لقيت الناس حواليا بتغلطنى وبقيقولوا بلاش مشاكل ياعم ...المصيبة المرة ان الناس دول قرايبى وجيرانى ومكنش لهم مصلحة بتاتا فى التزوير!!!

وعليه فمكنش فيه مانع من المشاركة فى عملية تزوير على نطاق واسع يكون لقرية صغيرة مصلحة فيها...شفت بعينى ناس بتسيب دايرتها وتروح تصوت فى محافظة تانية عشان ابن بلدهم مترشح فيها وشفت بعينى ناس بتصوت هنا وهنا وشفت بعينى ناس فرحانة انها بتزور وشفت بعينى ناس بتدعى بعضها للمشاركة فى التزوير ولما رديت بحدة   على واحد منهم جاى يقوللى تعالى سافر فبورسعيد حط صوتك للراجل بتاعنا طلعت قليل الادب .

الحاجة اللى تخلى البنى ادم السوى اللى هو من الثديات يقعد على قفافيزه ويبيض انه يشوف واحد طالع من الجامع تقطر المياه من لحيته وتشع السماحة من وجهه ويضحك ضحكة صافية يروح يشترك فى عملية تزوير ويدعو لها ...احنا بقينا قادرين نجمع كل الصفات دى فى شخصياتنا ازاى؟!

الحسينى ابوقمر-المحرض على مجزرة بورسعيد- ناجح فى 2005 بالتزوير والنائب الوفدى اللى قصاده فى الفترة دى رفع قضية تزوير وكسبها لكن المجلس كان سيد قراره وفى 2010 نجح بفرق 7000صوت قدام اكرم الشاعر ...اكرم الشاعى اللى واخد السنة 150000صوت !

اعرف شاب بورسعيدى و.ع  كان بيتفاخر انه حصل من الحسينى ابوقمر على 500جنيه فى عملية بسيطة كانت عبارة عن تقفيل شارع او تخريب مش فاكر بالظبط بس كانت فى ال18 يوم اللى فى اول الثورة واعتقد لما حاجة زى دى توصل لواحد ملوش فى اى حاجة زيى يبقى لازم تكون واصلة للامن بكل التفاصيل ... يعنى لو كان الامن قام بوظيفته من سنة بحالها مكنش حصل اللى حصل!

غربة الحق فى الوطن ده كانت بتتبدى لما اجى اتكلم فى انتخابات فى بلدنا وارفض التزوير ويجى واحد يقوللى بس متقولش الكلام ده عشان قرايبه ميزعلوش منك!

انا جار المحرض على مجزرة بورسعيد وانا من بلد جنب بلد البلطجية اللى راحوا قتلوا الناس فى ستاد بورسعيد وضميرى تاعبنى ومش قادر اغير شىء فى الناس اللى حواليا على الاطلاق....وحاسس انى عايش فى مزبلة ...لما يبقى فيه شباب جامعى مثله الاعلى واحد زى المحرض الحقير ده ابقى عايش فى مزبلة ...لما الناس فى احد الآتم تسيب العزاء وتروح تلتف حواليه ابقى عايش فى مزبلة...لما أحاول انطق بان الانسانية اعلى من المصالح الرخيصة والناس تزعل ابقى عايش فى مزبلة.


فى فترة انسحاب الشرطة من البلد السة اللى فاتت المنطقة كانت بتعانى الامرين من قرية صغيرة اسمها الشبول ...اهلها معظمهم بلطجية ومعاهم سلاح ومعروفين بشغبهم ...لما عرفوا الوضع ساعتها قالوا فرصة وعملوا دوريات لنهب القرى المجاورة...عارفين مين تصدى لهم وقتها؟....بتوع الحشيش والبانجو ...تجار الكيف خزوا على دمهم وشموا والشرطة معندهاش دم ولا ناوية...تجار الكيف افتكروا انهم بنى ادمين واعضاء الحزب الوطنى وساختهم ناقحة عليهم ومش قادرين يتخلصوا منها!

مصر تعج بالمحرضين وكلهم فى حمى عائلاتهم وخصوصا فى القرى الصغيرة وفى الارياف وكلهم على ستعداد لحرق مصر وكلهم لا ضمير لهم ولا ذمة وطالبنا منذ اكثر من عام بمحاكمتهم وعزلهم حتى تستطيع مصر الوقوف من جديد ولكن لا حياة لمن تنادى .

خيوط المؤامرة واضحة كالشمس ...بوابات خروج ملحومة واضاءة ملعب تنقطع ليمارس البلطجية بشاعاتهم وبشاعات محرضيهم تحت جنح الظلام وابناء مقدمى البرامج الرياضية والمحرضين واقربائهم لايحضرون المباراة بالرغم من انهم اشتروا التذاكر ومدير امن ومحافظ يختفون قبل المجزرة وبلطجية يعترفون على لمحرضين...لعلنا نرى فى هذه المرة ما يشفى غليلنا ولو ان ليس هناك ما سيعوض من راحوا.

اللى مات فى مجزرة بورسعيد مكانش 74 مصرى بس....اللى مات وطن باكمله ...مات ميعاد بين ولد وخطيبته ومات حضن اب لابنه الصغير وماتت صلاة فجر وتراويح وماتت ضحكة وماتت فرحة وماتت حصة فى المدجرسة وماتت سلامو عليكو وماتت ازيك وماتت كل سنة وانت طيب وماتت فسحة على شط النيل وماتت قصيدة للبحر او لعيون بنت حلوة ومات رغيف عيش سخن وماتت نكتة وماتت اغنية واتكدر احساس كل واحد عنده دم...ممكن يجيلنا نفس نحب ازاى والمجازر لاتتوقف من حوالينا...هنقدر نضحك ازاى والدم مغرقنا من ساسنا لراسنا؟...هنقدر نشتغل ازاى وغيرنا كان عايز يشتغل ومات؟!

للاسف التعلم عن طريق التجربة والخطأ تمنه غالى جدا وللاسف فيه ناس من شرفاء هذا الوطن بقالهم سنين بيسعوا لتجنب الموت وخراب الديار وبيلاقوا اللى بيصدهم وبيحبطهم...

للاسف الشديد انا مش شايف اننا غيرنا اختياراتنا بعد الثورة واعضاء مجلس الشعب زى مايكونوا نسخ بالكربون من الحسينى ابوقمر والمحرضين والمسترخصين دمانا !

هناك تعليقان (2):

أحسن تـستاهـل يقول...

جبت م الاخر لما قلت.. مش 73 اللي ماتوا .. اللي كات احساس كل واحد عنده دم.

دي مؤامرة لاسقاط الدولة .. مش لافشال الثورة.

انا خايفة لا نكون بنتهد فعلا .. وهنتجر للاسوأ.

انا مش عارفة يوم ما قامت الثورة ما قتلناش ليه كل الحزب والقصر الجمهوري وماسبيرو.

سلمية .. سلمية؟؟
طب أهوه

لا عارفين نجيب حقهم -الشهداء- .. وعمالين نموت زيهم

حاجة تنكد وتيئس وتحبط وتكئب

****************************

مها ميهوووو

Umzug Wien يقول...

لاقوة الا بالله