الاثنين، 20 فبراير، 2012

أنا بجح

 
صورة تعبيرية

 زجل فى أطار الحملة التميمية لإفساد أخلاق الشعب المصرى أكتر وأكتر


قول ورايا
أنا بجح أنا بجح
صدق وآمن واشتغل
تلاقى توا
كل مقفول يتفتح
قول ورايا
أنا بجح أنا بجح
حل لجميع المشكلات
سهل ومجرب معتمد
بدل ما صوتك يتنبح
قول ورايا
أنا بجح أنا بجح
شوف كام كتاب
وربى دقن
واحكى قصص
عن شاب عاصى وشاب تاب
وف كل يوم بالفتوى كركر
واصطبح
قول ورايا
أنا بجح أنا بجح
متخفش ابدا م الزمن
ثورة تدول وانقلاب
كل وقت وله ادان
واكيد اكيد هتلاقى ناس
شوقها الاساسى
تتمدح
قول ورايا
أنا بجح أنا بجح
انت الوطن وانت المواطن
ضحيت كتير
وشقيت كتير
واتمسح بيك الشوارع
على كل مدبح للفضيلة
انت الوحيد
قايم وطالع
تتدبح
قول ورايا
أنا بجح أنا بجح
المكاسب جاية جاية
بدون تراجع
وبعين قوية
أعلن على الناس حكمتك
جزمة ماشى
بيادة ممكن
كله قابل يتمسح
قول ورايا
أنا بجح أنا بجح
الخجل مش من شيمنا
وان قالولك يامنافق
التاريخ هو التاريخ
على صوتك
واملى كل الكون صريخ
مش فضيحة
ولو فضيحة
انت بتخاف تتفضح؟!
قول ورايا 
أنا بجح أنا بجح
النتيجة مضمونة خالص
العيال الهبلة طبعا كله ساقط
واللى ناجح 
 أراجوز وظابط
بس الخلاصة
انت اول مين نجح

هناك تعليقان (2):

maha miho يقول...

:))))))))))))

كوميديا سودا مقلّمة مخزية منعشة يا تميمي ^_^

*********************

مها ميهوووو

حلم بيعافر يقول...

أى خدمة

إبقى عدى الدهشة بس