الجمعة، 1 يونيو، 2012

تعقيبا على (الوضع)الراهن-قفل



لو البعيدة قفل
صبرا
انا المفتاح
افقعها نظرة تخر
كما قربة قدامى
وتقول هواك حامى
خدنى وسقانى المر
وانا حصن مفتوحلك
هين وكله بيبان
فابص بصة قرف
واقول منيش عطشان

لو البعيدة قفل
أحسن لها تسأل
مين قبلها هاود
مين قبلها عصلج
متجيش هنا تتقل
عيب وأنا مكسح
تسوق فى الاستعباط
وتقول انا بعرج

لو البعيدة قفل
حتما لابد تلين
تكونشى اصعب م الحجارة؟
تكونشى نايمة فى شق؟
تقدر تقوللى لاء
وانا سيد التعابين؟
يشوفونى يقفواانتباه
ويبلغوا التانيين
ان التميمى حضر
صحوا بقى النايمين
كله يفتح بقى
سواء عيون ضيقة
او عيون واسعين
شبه عيون البقر

لو البعيدة قفل
فلكل ليل اخر
بيقولوا عنه صباح
بيقولوا شط اللى عاشق
بيقولوا نور وبراح
مش سجن أو زنقة
بيقولوا فيه الحديد
فى غاية الرقة
يعنى اللى راكب دماغه
كبيره فيه زقة
جواب غرامى يجوز
دبدوب اروب يمكن
ونقول كده بعدها:
فاضل عليه دقة

لو البعيدة قفل
أكيد فى يوم هتحب
واما الغزال بيطب
تكتر عذاباته
وانا غليظ مفترى
على كل هين طرى
هاجمع جواباته
السرى للغاية
واللى يجوز ينقرى
والنشر للعبرة
ولرد هيبتى ع الملأ
ويامعشر الغزلان
مش اى ظبى اتخلق
يعيش على الدور
ويزيط ويعمل قلق
لو البعيدة قفل
انا فى الفتوح جراح
وايدى م المعجزات
وفى الحرير تتلف
ومفاتش عندى عليل
الا وف يومها خف
جراح سليل جراح
نسبى اهوه شاهد
ع النونو و الناهد
واللى الزمان جايبه
واللى خده وراح

لو البعيدة قفل
لوح القدر وضاح
زى المياه والنار
قدامها حل من اللى جاى
وعليها هى الاختيار
يا تجينى طلبة العفو
وتقول سماح يا اسيادنا
طالبة ف هواكو السماح
يا اشوف طبنجة فى جيوبى
واطخها وارتاح

ليست هناك تعليقات: