الجمعة، 15 يونيو، 2012

مرتضى منصور رئيسا



النشيد الوطنى

بالقانون بالقانون
احنا ياعالم يارمة
قادمون
بالقانون بالقانون
كل ماتطلب يكون
بالقانون بنظام ودقة
مش حداقة وجهجهون


ندما فاز منافسه الرئيسى فى انتخابات الرئاسة كانت مناحة لم يتوقف عن اذكائها الا بعد ان حكم القضاء ببطلان الانتخابات بسبب التزوير الفاضح الذى شابها .اذكر الان مشهد القضاة وهم يشدون شعورهم والناس وهى تبحلق وتحملق فى اندهاش ما بعده اندهاش.اتى معتدى معصور بصور وفيديوهات لم يعرف احد من اين حصل عليها او من الذى تواجد فى الاماكن المغلقة وغافل الجميع وصورها .صدع ادمغة الناس عبر وسائل الاعلام بالسيديهات التى يملكها حتى تمنى الناس لو يمنح هو مقعد الرئاسة بدون انتخابات.لعنوا اليوم الذى عرفوا فيه ماذا تعنى كلمة انتخابات اصلا.

وصل الى كرسى الرئاسة بعد ستة اشهر لم يهنىء خلالها منافسه على كرسى الرئاسة .طول هذه المدة مؤتمرات صحفية واحاديث ولقاءات وبرامج وفضائيات .لسان حال البلد كان يقول له نبوس رجلك تعالى واجلس على مقعد الرئاسة وحدث فى النهاية بحكم قضائى افاد بان الفائز الحقيقى هو معتدى معصور .

-من اليوم وصاعدا لمصر درع وسيف ....والناس الجمال اللى بتفرشلهم سجاد احمر وبيتصوروا ع التلفزيون دول معايا ليهم كلهم سيديهات...كله فى السيديهات...الواد الاسود بتاع امريكا ده له سيديهاية عليها قعداته مع الحتة الطرية الروسى اممم روسى عشان تعرفوا ان مفيش عداوات دايمة حتى لو دامت فالطراوة شىء والسياسة شىء تانى اممم مش عايزه يطلع تانى ويقول انه بيدور على الديمقراطية عشان انا عارف كويس هو بيدور على ايه وبقولع عيب عيييييب يا اسامة اللى انت بتعمله ده عيب شوفلك حتة امريكانية يااخى ومتبقاش زى القرع تمد لبره جتها نيلة اللى عايزة خلف ياشيخ .

-ياريس ياريس كلمة فى ودنك

-وايه يعنى؟...وايه يعنى؟...ميهمناش يا اسامة انا واقف اهو على المنصة وبقولك ميهمناش تقطعوا المعونة ...ميهمناش تمنعوا عننا السلاح...ميهمناش القمح بتاعكو ...احنا يهمنا مصر (فى الخلفية اغنية ياحبيبتى يامصر ) مصر مصر مصر

تصفيق حاد من الحضور يستمر حوالى دقيقتين كاملتيين ينبرى واحدا كالخازوق ويهتف بعد ذلك ليهتف الجميع بعده وتشتعل القاعة

يامعصور يامعصور هد وهد وهد السور

يامعصور يامنصور مصر فى عهدك شافت النور

ولا اوربا ولا امريكا مصر معاك يارئيس مزيكا

-كفانا هتاف كفانا هتاف ...اقعد يابنى عشان اكمل الخطاب عشان التقيل لسه جاى ورا ...احنا مصر ولما نقول احنا مصر لازم العالم كله يقف احتراما وتقديرا يقف انتباه ...الكبير لما يتكلم الصغير يسمعه الشيخ الكبير لما ينطق كلامه اكيد هيكون حكم وامصر كبيرة عندها اكثر من سبعة الاف عام مينفعش حتة عيلة مفعوصة عندها متين سنة تيجى وتقول معونة وسلاح .مصر هى اللى تدى معونات وهى اللى تدى سلاح للى محتاج وهى اللى تدور على الديمقراطية وهى كل حاجة وبقولك يا اسامة وحياة امى لاقعدك فى امريكا ما تعرف تخرج منها ابدا وانا لما بحلف بنفذ وافتكر شوشو انا مش زى اى رئيس سابق .وسفيرك يقعد فى سفارته مش كل شوية لمهولك م الموالد .فى مولد السيد البدوى اتنشل وفى مولد السيدة اتاخد فى حتة ضلمة انا مش فاضيلك ولا فاضيله بقى .

-ده كان بالنسبة لامريكا وهول امريكا ...اما بقى بالنسبة للقوى الطمعانة الجشعة اللى فاشخالنا بقها وعايزة تاخد حتة من مصر الثورة بقولها لاء عندك اقفى باحترامك وادخلى من الباب لانك اذا هوبتى من الشباك سنينك هتبقى جلة فوق دماغك .العيال اللى بتبعتوهم بيتقفشوا .بنشوفهم وبنسيبهم يدخلوا تحت عنينا وبنوصل للمنابع وبنجففها بس بهداوة مش بغباوة زى ما انتم شغالين عيب يا نجاد عيب دانت راجل مسلم ياشيخ عيب اللى انت بتعمله ده انت ومخابراتك عايز ايه ها عايز ايه؟...ما تيجى بنفسك وتقوللى عايز ايه يااخى؟...انت جيت قبل كده وانا قلتلك لاء؟

كلمة فى دونك ياريس

-كويس جميل احب انا ردود الفعل السريعة دى نجاد منتظر دعوتى لزيارة القاهرة وانا بقوله اهو وقدامكم جميعا مصر مفتوحة على مصراعيها قدامك يانجاد واحنا قرايب ونسايب وزيتنا ضرورى يبقى فى دقيقنا تعالى وهات معاك المدام بس خلى بالك بس بلاش العلب المقفولة عشان خلاص زكريا مشى تيجى بادبك واحترامك وملكش دعوة بحد فى قصر الرئاسة ياخويا الكلام بتاع زمان انتهى يا حبيبى...عايز تجيب هدايا يبقى لى ولمراتى بس ولو جبت حاجة للعيال يبقى فيك الخير وخى بالك انا محامى صايع فلو كنت بتفكر تلبسنى حاجة كده ولا كده اوعى...

سلامات سلامات سلامات مصر وايران اخوات
ياطهران ياطهران ملعون ام الامريكان
يامعصور قول لنجاد بينا وبين الغرب معاد

-عشان بس تعرفوا انى محترم وطاهر وكل لعب على المكشوف.كان ممكن اقابل نجاد فى الخباثة واخد منه اللى انا عايزه واديله اللى هو طالبه بس لاء مش انا اللى يعمل كده انا رئيس جمهورية مصر العربية وكل شغلى لجمهورية مصر العربية وده كان بخصوص ايران اما بقى بخصوص الست موزة...هههههاى الست موزة ...فيه واحدة اسمها موزة ؟!...بس العيب مش عليك العيب على التخمة اللى انتوا عايشين فيها مبتفكروش غير فى الاكل عشان كده اسمك موزة ...عايز اقولك كلمة واحدة بس يمكن متحبيش تسمعيها ويمكن تتعبك ....قطر مستحيل تبقى مصر ومش البترول هو اللى يعمل بلد ومش الفلوس هى اللى تعمل بلد البترول بينضب والفلوس بتروح وبتيجى ويبقى الانسان ...الانسان هو اللى بيبنى حضارة وهو اللى بيعمل بلد وهو اللى بيرفع راسه بين الناس وقامته تطول بقيمته مش بتلول الفلوس اللى واقف عليها ...


ليست هناك تعليقات: