الاثنين، 16 يوليو، 2012

ونتحدى بعرور


لمن يؤذيهم الدخيل البذىء على فننا الشعبى .لا تهنوا ولا تحزنوا فعند التميمى ما هوأسفل سافلين :D
جنسية

أنا أمى معاها بسبور
وممعهاش جنسية
أنا قلت اعملوا دستور
ومحدش رد عليا
ومحدش رد عليا
ومحدش رد عليا
عامللى فيها دكتور
وراسه طريق صحراوى
عايشللى فيها الدور
وبيطبخ فيها ملوخية
وبيطبخ فيها ملوخية
وبيطبخ فيها ملوخية
الدولة عايزة رئيس
مش عايزة واحد طرطور
خد جنب يا أبو الفوانيس
واستنى يا حلو الدور
استنى ياحلو الدور
استنى ياحلو الدور
يا برادعى خلى بالك
من حازم أبو إسماعين
منتاش يا حلو قده
اصلك نايتى وامور
اصلك نايتى وامور
اصلك نايتى وامور

الكيبورد

الكيبورد بتاعى
قارفنى ولاوى دراعى
مش عارف اشيت خالص
ولا الاغى الجو بتاعى
ولا الاغى الجو بتاعى
ولا الاغى الجو بتاعى
اكتبلها سين تيجى شين
والضحكة بتاعتى بتوصل
وكانها زى البوسة
تلطم وتقول يالهوى
وانا اقول ياليلة حوسة
ياليلة ياليلة حوسة
حوسة يا حوسة ياحوسة
الكيبورد ده صينى
والصين بتغش الحاجة
تشترى تكييف من دول
تفتح تلاقيه تلاجة
تفتح تلاقيه تلاجة
تفتح
تفتااااااااح
تفتح وتقفل تانى
لا صينى ولا يابانى
يسقط حكم المستورد
وليحيا المصرى يانى
اه يانى يانى يانى
وليحيا يحيا يحيا
وان كان يابيه معيوب
ماهو لاجل بلدنا تكون اصلى
نستحمل احنا وناكل طوب
طوب
طوب
طوب
طوب
طوب
طوب
طوب
افهمنى يابنى يللا
الصنعة مش عبث
لبسنا كام خازوق
ونصنا اتحبس
ونصنا اتحبس
ونصنا اتحبس

زرب

كله بيزرب ياخال
ياقلة الرجال
ماهو رجالتنا ماتوا 
فى سكة النضال
فى سكة النضال
فى سكة النضال
والمد الاشتراكى
طوفان جارف لعلمك
حينضف المجالس
م الفل وم العيال
م الفل وم العيال
عيال عيال عيال
يا كتاتنى يللا زعق
وادينى يللا poke
وقوللى وطى صوتك
ماهوكان مجلس ابوك
ابوك ابوك ابوك
يا عم الطلقة اهيه
وبيضربوا بالرصاص
يلعن ابوكو مجلس
انا مستقيل خلاص
خلاص خلاص خلاص
(فى هذه اللحظة يرقص ابو حامد فوق المقعد فيصعد الكتاتنى فوق المنصةويرقص هو ايضاويقول لابوحامد الا يزايد عليه فى الرقص فهو ليس اكثر منه ليونة ورشاقة)
هيلارى جاية ترطن
وتصدر الاوامر
والحج بلكلينتون
داير على حل شعره
بيمثل دور مغامر
ياهيلارى لمى جوزك
قبل اما تامرينا
احسن نبعت صعايدة
يحتلولك واشنطن
يحتلولك واشنطن
وقت الكلام ياخال
الكل ابوالسباع
يضرب طريخ طراخ
واول مايشوفوها
يجروا زى الفراخ
يجروا زى الفراخ
كاك كاك كاك
امريكا عايزة راجل
يلمها م الشوارع
ويوريها الهلاك
هلاك هلاك هلاك

اللت والعجين

زهقت من الكتابة واللت والعجين 
واحد بيقول سنون
والتانى يقول حزين
حزين حزين حزين
ياست يامعقربة
ياعجوزة ومكركبة
بتكرهى الرجالة؟
طب انت جيتى منين؟
منين منين منين
حطوا السكر ياحلوة
تحت السجادة ولا
جابوك من الحسين
 احلام يا سايقة فيها
العك له اصول
يافكرة نفسك لوا
وانت يا شاطرة صول
والنعمة لسه صول
وحياتى لسه صول
ومرسى لسه صول
طنطاوى لسه صول
وبكرى لسه صول
وصبحى لسه صول
وابوبركة لسه صول
وصول وصول وصول
زهقت من الكتب واللت والعجين
ابوام الدستور 
على ابو ام القوانين
على ابو ام القوانين
على ابو ام القوانين
انا تهت وماشى اطبش
حد يفوقنى انا فين
انا فين وفين وفين
وفين وفين وفين

 مدام عبير

لغى يا مدام عبير
واشربى العصير
بتروحى ف معادك
وانا فى المصنع اسير
وانا ع المكنة اسير
وانا فى الصالة اسير
ارجوكى بصى لينا
واحكمى بضمير
انا شاب ركبى سايبة
والاوفر تايم كتير
كتير كتير كتير
عايزين نروح بدرى
وعندنا مصالح
اخد الموزة ف ايديا
ونروح ع البحر المالح
ونروح ع البحر المالح
يا مالح
يااااماللللللللللللللللح
(وصلة رقص بلدى لمدة 10دقايق على نمةواحدةوكلمةواحدة:يامالح يامالح يامالح)
بنحيى عم صالح
قريب المرشد ياعم
ياللى انت مش اخوان
ماتخلى عندك دم
دم دم دم
ياعم هدى بالك
مطرح ما ترسى ترسى
ازاى تقول حمدين
وانت عندك مرسى
مرسى مرسى مرسى

فن هابط

بيقولوا فن هابط
وكلام سافل بذىء
انا يعنى اخدت واحدة
فى الضلمة وع الطريق؟
طريق طريق طريق
قال ايه مربى دقن
وعامللى عضو جامد
عنده برستيج وشان
لفينا مصر ليهم
وخدوها بالمقاولة
وعملوا نظام حصانة
للفرد مش لدولة
للفرد مش دولة
دولة دولة دولة
قسموها فسطاطين
بلد للمصطفين
وبلد للمطحونين
واحنا بيها اولى
اولى اولى اولى
تولونا اى تولة
فضل الصراح بحاله
ما بين المتخومين
واللى لا قوة ليه
ولا ليه ياعينى حولَ
عايزين لقمة ياريس
انا لما اجوع بهيس
وبقوم اعمل مصايب
مقاموش لسلام بلدهم
وقاموا للاجانب
قال ايه جناب جنابهم
واخدين م الفن جانب
عاملين علينا اسود
وعلى هيلارى ارانب

هناك تعليقان (2):

donkejota يقول...

هههههههههههههههههههه
هي صحيح افورت شوية في بعض حاجات

بس حلوة

Umzug Wien يقول...

شكرا على الموضوع