الخميس، 2 أغسطس، 2012

المجد للعمال

 مع العمال ضد الإستبن
ويسقط يسقط حكم المرشد
تعبان والدكتور واصفهالى
يسقط يسقط حكم المرشد
مع العمال ضد النخاسين 
من المصريين والأجانب


المجد للعمال
الميرى والتراحيل
اللى الزمن لو مال
بيعلموه ما يميل
المجد للعمال
واللعنة ع التكييف
والقعدة والدلاديل
زى الهاموش فى العدد
وميوزنوش منديل
منديل فى إيد الولد
منقوع فى صبر وجلد
فوق المكن بيسيل
منديل فى إيد الأب
عمره إختلس أو غب
م الأنجر المليان؟
منديل فى إيد البنت
بتنادى للعرسان
والمهر رقبة وثن
يا معشر الأوثان
المجد للعمال
رغم إختلال الميزان
لسه الشرف متصان

المجد للعمال
فى المصنع الأجنبى
منتاش إله أو نبى
بتقسم الأرزاق
المجد للعمال
والصنعة للصانع
منتاش إله مانع
كل البشر أبناء
المجد للعمال
والساعد الرافع
وسط الخرابة بناء
لسانا لحم ودم
والركعة ياراكع
مش للسماسرة
الركعة للخلاق
السوق يسوق العبيد
والخانع الطائع
السوق يسوق العبيد
والطاعة بيت الداء
لما القطيع يتلم
ويمصوا منه الدم
ويصدروه تصدير
للخونة والأعداء
واخشوشنوا تضمنوا
شخص النبى شافع

المجد للعمال
فى المينا والأرصفة
المجد للفلسفلة
بره الكتب تتقال
كل المدن مننا
كل المدن أحمال
شلنا فوق كتفنا
لا جهرنا يوم بأنين
ولا الزمان إكتفى
المجد للفلسفة
فى مذكرات عيل
المجد ده قليل
قدام ضمير العيال
الكلمة فيها الشفا
لوالضمير صافى
فولتين وجوز ارغفة
وتقوم تهد جبال
المجد للعيال
واللعنة ع المصلحة
لما الدقون بتتاجر
تلقى التاريخ إنطفى

المجد للغنوة
والضحكة والحدوتة
المجد للفرحة
مطلوقة أومكبوتة
إحنا الأمل عارف
من غير كتاب أو نوتة
بنغنى للحرية
م المنشا للموتة
عارفين مين الغارف
ومين أجير طافح
الدم والكوتة
المجد للبنوتة
يا سادة كان يا ماكان
فى الساقية مربوطة
أميرة بنت أمير
المجد للتحرير
أرض العيال الخضر
طلعنا م الأسفلت
من غير سقاية ورى
قالوا طلعنا إزى
زرع إنما شيطانى
غنينا من تانى
المجد للغنوة
والضحكة والحدوتة
المجد للفرحة
مطلوقة أو مكبوتة
صعاليك بنبنى الوطن
وبيفرشوه تمليك
وبياكلوا مالوا النبى
وبدمنا التسليك
يا إخوانا ما للنبى
ما هو ليا وليك
إن العدالة حقة
مش عطف أو رقة
من فرقة المماليك

المجد للعود
زى الأدان حازم
قال إننا راجعين
ورجعنا نتقاسم
فى الفجر حرية
طلعة نهار حاسم
الثورة دى عادة
وميدانا سجادة
 إن الهتاف راسم
زى الصلاة والصوم
أيامنا دى عبادة

المجد للعمال
إحنا الوطن والشعر
ما إحناش هنا للبيع
وإن كنتوا سعرتونا
مالناش يا عالم سعر
عمر البلد دى عملنا
لن تعدولوا فى الأجر
المجد للعمال
إحنا العلموالنسر
والنيل ومعبد أمون
والقلعة والكرنك
وإحنا صلاة الفجر
ما يأمناش سمسار
المجد للعمال
واللعنة ع التجار
أتى علينا زمن
ضاع عمرنا فى العجل
وفى بدلة الأستاذ
وفى شنطة الهانم
وفى ساعة فى النادى
طراوة بعد العصر
أتى علينا زمن
ساق الهبل وارتجل
وادى الأجانب مصر
بقوا نهابين أعمار
والعملة جنسية
وجواز هزيمة ونصر
أتى غلينا زمن
ضاع عمرنا فى الباص
والزحمة والتنطيط
بنشر ملح وقهر
لو إتعصرنا عصر


هناك 5 تعليقات:

وظائف خالية يقول...

ربما كانت هذه هي زيارتي الأولي لهذه المدونة .. ولكنها حتماً لن تكون الأخيرة
فالمرء يقابل أحياناً من يظن في نفسه القدرة على التدوين .. وهم كثير
ولكنه يأتي عليه يوم - مثل هذا اليوم - يقابل فيه من يلتهم كلماتهم المكتوبة التهاماً
شكراً لك على العرض الرائع :)

Übersiedlung Wien يقول...

شكرا ع الموضوع

حلم بيعافر يقول...

شكرا يا شباب

نورتونا

Umzug Wien يقول...

شكرا ع الموضوع

Firmenumzug Wien يقول...

شكرا ع الموضوع :)