الثلاثاء، 21 أغسطس، 2012

أبجديات الرفض تانى



لأن التعليم أصبح مهنةمن لا مهنة له فلا غضاضة ان يمتهنه خريج كلية علوم لم يقرأكلمة واحدة فى الفلسفة ولا علم النفس ولا أصول التربية أو مناهجها يحدث التحرش
لأن التعليم أصبح مهنة حقيرة لدرجة أن أصحاب الدبلومات ترتضيهم وزاة التربية والتعليم مدرسين ولا ترتضى المؤهلين يحدث التحرش
لأن المدرسة أصبحت بناءا أسطوريا نسمع عنه فى الحواديت يحدث التحرش
السواد الاعظم من هذا الشعب جاهل والوصف وتقرير الحقيقة ليس تعاليا 
إهترأت كل مؤسسات التربية فلا بيت يربى ولا شارع يربى ولا مسجد يربى ولا كنيسة تربى ولا مدرسة تربى ولا إعلامولا أى شىء
إحنا بجد محتاجين ننسف ونبنى من جديد والترقيع والترميم مش هيجيبوا نتيجة 
ممكن نضحك على نفسنا ونقعد نتغفرج على العيلين المصروف عليهم اللى زى الفراخ البيضا اللى بيطلعوا فى البرامج ونقول مصربخير وممكن نواجه نفسنا ونعرف ان مصر مقبلة على كوارث وهوايل ونحاول نصلح
فى كتابه الذكاء العاطفى اكتشف دانييل جولمان ان امريكا مقبلة على احداث عنف وجائم من سلوك الاطفال الصغار لانهم باختصار المستقبل واحنا لازم نعمل كده لاننا لو مخدناش بالنا من مستقبلنا هنضيع كلنا

 

(تدوينة قديمة وللاسف لسه محتاجة للتكرار)
بكل بجاحة ووش مكشوف ممكن اجزم ان مفيش اى متعة جنسية بتعود على المتحرشين وشىء طبيعى ان المتعة الجنسية دى شىء مش بيتحقق غير بعد تحقق حاجة اسمها الخصوصية يعنى بالبلدى العبيط كده لازم الموضوع يبقى متدارى الا اذا كان بقى فيه مرض نفسى عند المتحرش ودى حاجة تانية وموضوع تانى لان ده لو موجود فعلا يبقى المجتمع كله مريض نفسيا ويافرحتك يادكتور احمد عكاشة!!!....طيب تبقى كده المتعة الجنسية هى سبب مستبعد من اسباب وقوع عملية التحرش فى الشارع المصرى وانتشارها طوووول السنة طالما فيه تجمع كبير بس احنا بنركز عليها فى العيد بس يمكن عشان فيه حاجات تانية بتشغلنا والرغى فيها من وقت للتانى واحنا اجدع ناس يخترعوا ويفبركوا ويندمجوا فى التظاهر بحل تفاهات اصروا على انها مشاكل ولازم تقتطع وقتهم كاملا

لو قسمنا الناس اللى بتقوم بعملية التحرش دى دللوقتى هنلاقى غالبيتهم شباب لم يحصل على قدر كاف من التعليم ونسبة مش قليلة من الاطفال اللى متعدوش سن ال18 والنسبة دى بدات تكتر جامد والقاسم المشترك بين الشريحتين دول هو زى ماقلت وبكرر تانى لسه مقدروش يكونوا شخصية سوية ومعتدلة بسبب قدر التعليم اللى تلقوه وان كانت الشريحة التانية عندها اسباب تانية ممكن نقول انها محركهم تجاه عملية التحرش زى التقليد لفعل الشريحة الاولى دى على اعتبار ان دى حاجة زى السيجارة من وجهة نظرهم بتثبت رجولة اللى بيعملها

طبعا فيه ناس تانية غير الشريحتين اللى انا قلتهم دول بس انا ركزت على النسب الاعلى من خلال مشاهداتى ومتابعتى للموضوع اللى بيتكرر دايما وحاجة تانية مقدرش اغفلها وهى وجود متحرشات بالذكور....ايووووه فيه متحرشات ومتنساش عزيزى المواطن ياللى حظك ساقك لهنا وبتقرالى ان احنا مجتمع منحل ذكورا واناثا وبص حواليك وانت تأمن على كلامى

ضمير اى امة هو المبدع او المبتكر او الفنان والفن دايما وابدا بيكون وجدان الشعوب وبيرتقى بمشاعرهم وباحاسيسهم وبتصرفاتهم وبكل مايصدر عنهم لشىء من التحضر والتمدن ...طيب لما نجم الجيل عافاه الله واعزه لمن نجموه يغنى ويقول(خليها تاكلك )وحاجات تانية مفيش داعى اذكرها ولما نجم تانى نصبه نفس الجيل يقول فى احد افلامه (-a7a-؟!!!)...مفيش خلاف على ان ابجديات كل شعب بتتغير من وقت للتانى حسب ظروف العيشة واللى متنيلين عايشينتها بس برضه فيه مصفاة بتنتقى وبتختار وبترسخ وتثبت اللى يفيد وتستبعد اللى يضر وياذىو حااااليا المصفاة دى مخرومة وبتعدى اى حاجة ومبقاش فيه حاجة اسمها ضمير امة واو بقى بقى فيه حاجة غير اللى نعرفها ويااما بقى نرجع من اول وجديد ونعيد ترتيب دماغنا- ونمسك المصطلحات اللى متستفة فيها وننفضها لان الزمن عمل فيها عمايله -يااما نرضى بالواقع ومنشتكيش بقى ونرضى بتامر حسنى (-خليها تاكلك-) كنجم جيل ونرضى بمصطفى كامل(-عليا الحرام من دينى) كمثقف بيمثلنا وبيوجهنا ونرضى بهيثم شاكر(-بلا قومية بلاخرة-)كرمز وطنى بنلتف حواليه وبنغنى معاه ارمى حمولك عليا واوعى حد يقولى انى بنتقى امثلة وحشة لان دول اللى موجودين ع الساحة ونادرا مابتلاقى حد تانى واخر مرة شفت فيها حد محترم وبيقدم فكر ورؤى محترمة جه يتككلم فى برنامج من برامج التوك شو اللى موجودة كان وسيم السيسى وكرم حجى ومبقيتش مصدق وكنت عايز ادخل جوه الشاشة واخدهم وامشى ماهى حاجة متتعقلش ازااااى الناس اللى مستنية خناقة شوشو ومرتضيللى يجيلهم ناس تصدع دماغهم بعلم زى المصريات ولا اى حاجة تانية وحقيقة واقعة بقى ومش كلام مصاطب ان ده اصلا اتجاه الدولة ومش عارف هما اصابهم الغباء وازاى يقصدوا تسطيح النناس بالطريقة الفجة دى والمخرج عايز كده والجمهور اتهبل وفاتح بؤه وعينيه مبترمشش

اتفقنا ان فيه ابجديات جديدة عدت م المصفاة-طالما انا قلت كده يبقى اتفقنا متتعبونيش معاكم-ومن ضمن الابجديات الجديدة دى ابجديات الرفض....وبديهى جدا ان اللرافض بيستخدم ابجديته اللى بيمتلكها حسب موقعه وحسب سلطته واللى يقدر يعمله بحيث يكون من وجه نظره انعه مؤلم ورادع للى بيرفض فعله يعنى مثلا ابن اختى الصغير لما ميعجبوش حاجة منى بيشد شعرى لانه فهم انى بتضايق من الحكاية دى وعارف ان له مساحة مش بطالة فى قلبى فبيشد وقلبه جامد و كان ممكن يعيط بس او يعمل اى حاجة تانية لو سلطته ووضعه ميسمحلوش انه يشد فى شعرى وهى دى ابجدية الرفض بتاعته والابجدية دى بتختلف من شخص لشخص فمثلا ممكن تكون الابجدية دى عبارة عن كلمات سبارتكوس الاخيرة وممكن تكون فى احمد العربى واللى يفهم يفهم واللى ميفهمش بيكفر ويقول زنديق ويهدر دمه

نسيب ابجديات رفض ابن اختى وأمل دنقل ومحمود درويش ونيجى لابجديات رفض المواطن المصرى اللى ظروفه معروفة ومكشوفة قدام الكل...الشاب المحدود الدخل المحدود النصيب فى التعليم لما يجى يعترض فى او يبدى غضبه على مجتمعه فى وسط حشد من الناس ياترى ممكن يعمل ايه غير اللجوء لصدر او مؤخرة فتاة؟... اى فتاة مهما كان شكلها ولابسة ايه ان شالله يارب لو كانت لابسة خيمة متعرفش وشها من ضهرها فالعملية مش عملية شهوة او شبق جنسى قد ماهى عملية رفض ونبذ وغل من مجتمع باكمله...الشاب المصرى المحدود الدخل والمسطح والمهمش لما حفنة اللاعبين اللى متسلط عليهم الضوء يحققوا مكسب تلاقيه من غير مايشعر طالع يرقص فى الشوارع لحاد الصبح زى السكران اللى مش عارف بيعمل ايه غير انه ارتاح لما كسر عربية ولا محل فى وسط احتفالاته المزعومة والمروج لها من كل الجهات الللى تهمها عملية التسطيح السابق ذكره....وفى فترة زمنية مش بعيدة كان لما المجتمع بيرفض حاجة ممكن يعمل مظاهرة او وقفة احتجاجية مش يتحرش ببعضه او حتى انقلاب عسكرى بس كان بيبقى مجتمع العالم بينظرله نظرة محترمة مش نظرة انحلال وقلة ادب

اخيرا احنا بجدياتنا اتغيرت ومن ضمنها ابجديات الرفض وكل واحد بيرفض حسب مستواه الفكرى والثقافى زى مابيشوف الدنيا حسب مستواه الفكرى والثقافى برضه ورد الفعل من المشاهد اللى ع البر وبيتفرج ع الحكاية من بعيد بيتغير مابين تقدير للرفض ده او استنكار ليه



زمان كانوا بيغنوا وبيقولوا-واثق الخطوة يمشى ملكا
دللوقتى بيغنوا وبيقولوا-اه يانى يانى يانى مش هعمل كده تانى
زمان كنا بنحارب مع بعض وبنتهزم وبننتصر
دللوقتى بنحارب فى بعض والطرفين مهزومين
زمان الناس فى الخرطوم شالت العربية بتاعة عبدالناصر من ع الارض وهو راكب فيها
دللوقتى اى رئيس عربى بيظهر ع الشاشة فى نشرة اخبار بيتف عليه وبيشتم

هناك 4 تعليقات:

شمس النهار يقول...

الموضوع اخد كلام ورط كتير

وحاسة انه مفتعل
وعايزين يقعدوا البنات والستات في البيت
اي خافوا وكنوا في بيوتكم

وكل سنة وانت طيب

وموضوع المدرس والتعليم ده انا معاك فيه جدا
لازم ننمي المدرس ونختاره كويس جدااااااااااا
وننهض بالتعليم
وكمان بالخطاب الديني
يعني نربي الناس دينيا صح
ونربيهم تعليميا صح
مايبقاش التعليم شوية كلام في كتاب لازم احفظهم علشان اروح ادلقهم في الامتحان وانجح وخلاص

حلم بيعافر يقول...

كل سنة وانت طيبة
الموضوع بقى مزعج جدا ومش مجرد مشكلة آنية بس ..احنا كده عندنا مصيبة فى المستقبل

حلم بيعافر يقول...

كل سنة وانت طيبة
الموضوع بقى مزعج جدا ومش مجرد مشكلة آنية بس ..احنا كده عندنا مصيبة فى المستقبل

entrümpelung يقول...

شكرا ع الموضوع




entrümpelung wien
umzug
Räumung
Kleintransport Wien
Wohnungsräumung Wien
botendienst Wien