الثلاثاء، 11 سبتمبر 2012

حلال



حلا لُُ حلالُُ حلالُُ حلالْ
انك تجرب وانك تعيش
وتسعى سعيا للجمال
يا انسى ياللى للاغانى عليك تملى
كل الدلال
الكون د ايه غير سيمفونية؟
بهجة جايز...
واحتفال لو كنت عايز
تقدر تقول كده ...كرنفال
كل شىء موجود يسبح
كل شىء مولود بيمرح
مين بقى ياخلق يشرح
فى الهوى سر الوصال؟

حلالُُُ حلالُُُ حلالُُ حلالُ
انا لما شفت عيون حبيبتى
القلب مال
منكرش عشق الروح
بس سحر النظرة قادر
لحظها فوق الاحتمال
انا لما شفت عيون حبيبتى
قلت ياااااااااه
دانا كنت ميت
سبحان محيى المفقودين
جالب حضورى من زوال
انا لما شفت عيون حبيبتى
قلت اااااااااااه
ياوجع عمرى اللى عدى
يازمان استنى واهدى
فيه ايه وراك؟...
كنت طوعك من شوية
م النهارده انت طوعى
امتثل ليا امتثال
انا لما شفت عيون حبيبتى
قلت مين لسه بيلحد؟!
بوست ايدى فضلت احمد
صاحب الذوق والكمال
عاجن الضد بنقيضه
العلى من فوق عبيده
اللى لو لحظة تجلى
تنسخسف خسف الجبال
انا لما شفت عيون حبيبتى
رقصة النشوة طغت
وف ساعتها
كل احزانى اتلغت
شفتنى واقف وبرقص
كل ما حواليا يرقص
الورق
والبرتقان
والسرير
حتى الحيطان
والغسيل فوق الحبال

حلالُُ حلالُُ حلالُُ حلالُ
انك تشوف الكون بساط
وانك تدوب م الانبساط
تعلن على الخنقة اعتزالك
يا حلاوة الاعتزال
انا كنت ماشى عقب صلاة الفجر
لسه ف صدرى من حلاوة الابتهال
هى ف ايديا
ولسعة البرد الخفيفة
شفت ف عيونها السؤال
هو بكرة مخبى ايه؟
خدتها بسرعة فى حضنى
من ساعتها
بطلت احلام مخيفة

حلالُُ حلالُُ حلالُُ حلالُ
خطى خطوة
قصر المشوار شوية
قابل ف نص السكة
 كل مالك من امال

لا تبعد الشقة بين المرء ومراده
ولكن يجعل الجبن بينهما جبال
كل هذا الملك كان مؤجلا
محض فكر او خيال

حلالُُُ حلالُُ حلالُُ حلالْ
انك تفكر
متسيبش عقلك للصدى
ياتهتدى زى اللى قبلك ما اهتدى
يا تلبسه زى النعال
مين اللى خالق؟
مين اللى طالق
كل البشر للتجربة؟
وازاى كده
ماشية الامور مترتبة
دون اعتلال؟
راح تجرب ولا تهرب؟
وان قابلت النبع صافى
هتقول دى شبهة؟
ولا لاء هتوطى تشرب؟
ان وقفت على الحدود
ان رفضت انك تخوض
تبقى الحياة متركبة
من مشاكلها العضال
حلالُُ حلالُُ حلالُُ حلالْ
انك تشوف الحق حق
صافى زى عيون حبيبتى
انك تكون للحق درع
انك تكون للحب فرع
انك تعيش طاهر حنون
انك تموت موتة رجال
كون جيفارا وقوم وحارب
انسانية
مش عشان حفنة غلال
لما غيمة البؤس تحجب كل شمس
كون مهرج
يزرع الضحكة بلطافة
على وشوش العيال
كون بلال واطلع ادن

ستظل هذى الارض عطشى للاذان
وتظل حاجتنا ملحة للشهيد من آنِِ لآنْ
ويظل دمع العين فى شوق ليجرى
بعد دهر من تمنع واحتقان
كن مستعدا للشهادة
هكذا هى الرسالة
ولا تزال
ابقى قاصد وجه عدل
ابقى طير وافرد جناحك
متكونش ندل
كون عمر عام الرمادة
ياما قاسى وياما شال
حلالُُ حلالُُ حلالُُ حلالْ

هناك 7 تعليقات:

فتاه من الصعيد يقول...

إيه التفاؤل إللي بلا داعي ده :D

يلا كلها يومين وترجع تعيط :)))

أحسنت :)

still-searching يقول...

جميلة جدا
تسلم ايديك :)

Wohnungsräumung يقول...

Thank you for your wonderful topics :)

العاب النادي يقول...

تسلم الايادي

عروض اتصالات وفودافون وموبينيل يقول...


بصراحة الواحد نادر قوى لما يلاقى مدونة او موقع يستفيد مهم بشكل كبير
اشكرك على اسلوبك وطريقتك فى الكتابة ، وكمان مدونتك ذوقها جميل جدا
وتتمتع بالسهولة والبساطة فى التصفح وبها مجموعة من المواضيع الرائعة والمفيدة

اعرف امكانيات موبايلك يقول...

على الانسان ان يستفيد من كل ما يقابل فى حياته ، وانا استفدت معلومة جديدة اليوم من هنا

العاب يقول...

nice topic