الأحد، 23 ديسمبر، 2012

سيف العدالة



سيف العدالة تلم
من كترة الركنة
لا اللغوة هى اللغوة
ولا لكنته اللكنة
ياسادة ياحكام
يامزوقين الخطب
ومحملين الكلام
بزيادة فوق طاقته
الحق حان وقته
يا مرصصين الخطب كحجارة فوق شيشة
ياخانقين الصفا
ياممرى العيشة
السمع منكو اكتفى
عجز البصر من سطوة الدخان
عز النفس
ياتاليين حكم العسس
او امتداده
الحق معلم فوق وشوش الثائرين
وعمره مايفارق بلاده
اصل احنا زاده
لو فاطمة بنت النبى سرقت
كان قطع ايدها
وهى بنته
وهى اللى اعز ولاده
كان اطرفله رمش؟
ولا يقول معلهش؟
الا ان اقام الحق
ودق اوتاده؟

لو كنا طالبين معجزات
كان بعضها اتحقق
كان ممكن القمر ينشق
والشمس من تحت الرصيف تشرق
يا باحثين عن صفاء البال
يا باحثين عن وطن أهدأ
يا كل راكب فوق كتافنا
لك حق تسبق
ما دام ميزانهم
فى الحقوق ميال
موت الفقير عادة
بيحسبوه فرخة
بيموت صريع الجزم
ويموت من النفخة

سيف العدالة تلم
يابوم كتير ساكنة
جوه اعشاش الحمام
كان فيه حكاية كده
شايلها مر الكلام
بتقول عقاب اللى اعتدى
سلة زبالة والسلام

سيف العدالة تلم
ياراكب الدبابة
ياحديد علينا أحن
من نظرة الفرعون
سيف العدالة تلم 
لازم ف يوم يتسن
لازم تكون له عيون
تشوف عذاب الضحايا
تعدل ميزان الكون

يا محتسب فوق الفرس
الغنوة أبقى من رنين الخرس
والحر حر وبالوطن مهووس
وأحلى ما فيك ياابو الفوارس هوس
يفدى بدمه أهله والأوطان
وان هالوا فوقه من العبث أطنان
بيقوم وينفض كل هذا العبث

يا محتسب فوق الفرس
انحت ف جلدى بس انتظر قومة
وإن عشت ياحكومة
مش هانسى ريحة القنابل
ولا هنسى رمى الرصاص
وإن عشت ياحكومة 
مش هانسى تار اللى راحوا
ولا هنسى دين القصاص
وإن عشت يا حكومة
هعيش كشوكة ف حلقك
ولن يغالبنى النعاس



هناك تعليق واحد:

un4web يقول...

مشكووووووووور
http://www.alsadiqa.com