الخميس، 18 أبريل، 2013

احضنينى

يولد الشعر من رحم الدهشة ومن وقع تحت طائلة طلتك ولم يدهش فهو صنم حلال فيه الرجم لانه مر بفتنة مقدسة مرور عابر ولم تتح له صحراء روحه الجدباء من المشاعر ان يعقب.

احبك جدا وظنى ان هذ الحب سيزيدنى فوق عمرى الكثير.لنتحايل اذن على الدنيا ونحفظ هذه الاوقات بعيدة عن غوائل الزمن.


حرمت خلااااااااص بطلت احلم
من بعد ماشفت بعينى العلم
حرمت خلاص بطلت احلم
وده يجى فى رسمك ايه الحلم؟
حرمت خلاص بطلت احلم
وحقيقتى بشوفها اهيه بالاسم
نازلة من الجنة على وجه الارض
وفرضا فرض
انا كنت حلمت
كنت هشوفك كده يعنى؟
لا عرفت الفرحة الا بفضلك
ولا دقت اللهفة الا عليكى
ولا حظى استذوق قبل ما ترضى
وف مرة طاوعنى
دانا قلبى رهين برموش عينك
دايب ماله حيلة
ان صابك حزن ياست الحسن
بيوجعنى
حرمت خلاص بطلت احلم
واحلم ليه يعنى؟
انا صاحى اهوه
تنادنى اجيلك
ولا شىء فى الكون ده هيمنعنى
شغلى اغنيلك
واتهجى فى ليلك
سفر العشق
من يوم مارميتى سهامك
من يومها ورشقت رشق
شاورى وانا احكيلك
ازاى قناديلك
فرشت ربكة نفسى سلام
شوفى بنفسك
كل تاريخى الام فى الام
كل نضالى كلام فى كلام
مدى ايديكى
كونى حياة
كونى مطر
كونى فرح ولا عمره خطر
على بال انسان
كونى وتر
عليه اقوملك بالغنا
--ها الشاب وهالصبية
وحدن ع اطراف الدنا—
كونى انا
تعرفى تكونى انا؟
صبى تنهيدك فى روحى
والمسى بايدك جروحى
واحضنينى كالرضيع
وارهبى خريفى بنظرة
واقلبيه توا ربيع
احضنينى احسن اضيع
وانتكس
تتقلب بيا الحكاية وتتعكس
وارجع احلم ياحبيبتى
احضنينى والا ذنب كبير هيفضل
فى الهوى بيطاردك انت
وانت عارفة قلبى طيب
عمر ظنك فيا خيب؟
ماارضاش تشيلى عشانى ذنب
وانا بين ايدكى اهوه بقولك
احضنينى
احضنينى احسن حرام
بكرة نتحاسب على العمر اللى عدى
بكرة؟
بكرة ممكن شوقى يهدى؟
مستحيل
لو فضلت العمر اوصف
لو فضلت العمر احلف
لو فضلت العمر احبك
برضه ياحبيبتى قليل
احضنينى قبل ما يجينا الحساب
ليه وقفتوا على العتب
ورفضتوا لنعيمها الدخول؟
متقوليش وبلاش اقول
احضنينى ياحلوة بس
خلى كل كلامنا همس
فيه هنا اتنين فى واحد
فيه هنا جنية
وقلب جاحد
لما اتحضن تاب خلاااااص
توبينى
طهرينى
اغلسينى من الدنس
امسحى كل الحكاوى
عن كلاب القصر وكلاب العسس
واكتبى على ذوقك انت ياحبيبتى
ولا مش محتاج كتابة
فارسك فوق الفرس
افردى جناحك يا حلوة
واحضنينى.


هناك تعليق واحد:

ريوبى يقول...

موضوع ممتاز
ryobi