الجمعة، 19 أبريل، 2013

جواب


بعد الحداد والدموع
احب اقولك ان مصر
شوارع وشجر وبيوت
زى الدهر
أبدية
مبتعرفش تموت
ومبنعرفش نموت
الموت ده عادى
واحنا بتوع المعجزات
ضربونا باغبى رصاص لديهم
وداسونا دوس بالدبابات
كنا موتنا؟

وان جيتى مصر
تنورى
وتزيدى سحر
وان جيتى مصر
تصورى
تبقى بسعر
والف مين يلزق تكت
الناس هنا زى الملايكة
طيبين
بس التكت هو التكت
الف مين بيطوره
والف مين شافه وسكت

بس برضه
أحب أقولك ان مصر لسه صاحية
ومبتعرفش تموت
وان كانت هى فى ناحية
واحنا فى ناحية

ان جيتى مصر
ابقى اسالى
فيه كام شيطان
فيه كام ولى
فيه كام حوار
وكام تغير مفصلى
فيه كام حرامى
وكام على
ان جيتى مصر
تخيلى
ان البلد هادية واليفة
بفضل محبوها الخليفة
تخيلى
لزوم البهجة يعنى
وما يلى

اقولك تانى
اقولك يانى
ادمنا الأسر
بس نفسنا طويل بغباوة
احنا وكل كلاب القصر
اصحاب اصحاب
سكينة وماشية تمام فى حلاوة
اقولك تانى؟
كل ما يسقط منا رفيق
كل ماسكة مصر تضيق
بتزيد فى قلوبنا
جمال وغلاوة

تفتكرى يعنى
هنعيش كتير؟
هنعيش لحد ما ننتصر؟
والنصر حق؟
والحب حق؟
ومصر حق؟
تفتكرى فعلا ولا لاء؟

الصور مالية الشوارع
اللى نازل واللى طالع
اعلانات
تشترى؟
ان جيتى مصر ابقى اشترى
نقى اللى عمره طويل وينفع
نقى اللى عند السلطة يشفع
نقى اللى ينفع ينقرى
بلاش امور السيريالية
القوة اوضح م العواطف
والسلطة أنقح م القضية

إن جيتى يعنى وشوفتى حد
يشبه لنيل
او نخيل
او او اهرامات
او حتى سد
ابقى بوسى بوسة جد
واحضنيه
وقوليه فيه واحد زمان
داب من الشوق واتعصر
بيحكى عن شعب ووطن
عاش وقاوم وانتصر
ده ان جيتى مصر

  
  

هناك تعليق واحد:

ريوبى يقول...

موضوع ممتاز
ryobi