السبت، 11 مايو، 2013

ساحر


أنا ساحر
وبدى أعملك عمل
يموت فيكى الخوف
ويصحى فيكى الأمل
بلاش كلام تخين
واحد يقعد يجعر
واحد يعمل مُقعر
خلينا كده حلوين
ماحلاها عيشة الهبل
وبلاش كلام فى الدين
أنا مؤمن بيكى إنت
وإنت زى ما أنت
حتى ان عبدتى هُبَل
أنا مش عايز مساعدة
سيبينى بس اكتشف
احساس عجيب مختلف
بين حضن دافى
وقُبَل

عمل يفك النوم
 وحجاب يمد الوقت
تعيشى ساعة فى يوم
نلحق نغنى ونرقص
 فاتنا كده كام قطر؟
نلحق كتاب الهوى
ونطبقه بالسطر

عمل يفك العادة
والسلو والتقاليد
مفيش هنا أوليا
مفيش هنا أنبيا
كله جديد فى جديد
العشق فوق سجادة
والنوم على سجادة
أصل الحكم بتقول
وصل الأحبة عبادة

أنا ساحر وأنا عارف نفسى
لو ترسى على جهنم
ترسى 
معمولى هناك تشريفة
أنا عارف نفسى تمام
لا مربى دقنى
ولا عندى واسطة
ولا حد تقى يلحقنى
ولا كنت كلب بسلالسل 
فى بلاط أيوتوها خليفة

أنا ساحر مربوط بخطيئة
والأساطير بتقول:
الحب علاج
وبلدنا محتاجة
والكون كمان محتاج
من مدة للتانية
يظهر لنا حلاج
يبوح بسر الحقيقة
ويرد روحنا طليقة
تهدر كما الأمواج

وعيونك صوفى عتيق
من غير عمة
وعيونك برضه طريق
ومشيته بذمة
ونهايته تكون براحتها
ووهجه يكون على كيفه
ومفيش خيارات بين إما وإما
يتساوى فنائى فى نورك
ببلوغ القمة

ليست هناك تعليقات: