الاثنين، 19 أغسطس 2013

غزل



كنت بقولك
من غير لا كسوف
ولا احراج
صعب انى افرح
من غير ما اعملك تاج

انا عايش كل حياتى كروكى
بس انا قدامك
لازم اتنفس بالراحة
لازم اتكلم بمزاج

وده طبع
ف دنيا واخرة
انا حاسس حتى صراطى
لازم هيكون زجزاج

وكل مرة ارتجل
قدام عيونك
لازم اقدم
احتجاج
 
كل حاجة بتشتبك
مع كل حاجة
كون مصاب
بالارتجاج
 
بس برضه
شهادة لله والزمن
عمرى ما ضلمت ابدا
الا ولقيتك سراج
 
لو ماكانشى فيه حلاوة
ماكانش سوق العمر راج
 
لو ماكانش فيه حبيبة
كان زمان قلبى الصغير
قلب صاج
 
 كانوا الملايكة يدللوا
تعيش يا بيه مليون سنة؟
بجلد فضى وسن عاج؟

نمط بوزنا
ونقول بلاش
يرفض الطلب المقدم
لانعدام الاحتياج

ايه لزوم الخلد لما
تعيش مريض
من غير علاج؟


ليست هناك تعليقات: