الجمعة، 4 أكتوبر 2013

أقدر


أنا أقدر آجى
وأقدر  أمشى
من غير ولا صوت
كتكوت فى الضل
طالع بحسابى
الصافى الخالص
لا يزيد قشاية
ولا حتى يقل

أنا أقدر
 أغيب
وأغيب
 وأغيب
وأطل

أنا ممكن أصاحب صاحبى
وأطلع مجدع
وممكن أفل

أنا أقدر أطلع فوق
وما ابصش تحت
وما توحشونيش
أنا أقدر أعيش

وأقدر إن أنا أستعمى
وأطنش
وأقدر إن أنا أفضحكو
وأشيل طبقات الورنيش

الدنيا بتجرى بغباوة
وكتير بيشد ف كمى
وأنا واقف
حتى ما بامشيش

وباحب أموت
فى اليوم دقايق
وساعات ساعات
وأصحى جدع
مبسوط وفايق
غير اللى مات

ليست هناك تعليقات: