الاثنين، 2 ديسمبر، 2013

حسين وسحر



الأسطورة بتقول ان محمد عمل لايك لصورة دعاء وماعملش لصورة منة رغم انهم نزلوا ع الهوم فى وقت واحد
سحر بنت خاله خدت بالها من الحكاية دى فنقلت "منظمة حول للأخبار العائلية" الموضوع لامهمحمد:محمد شكله لقى بنت الحلال
بدأت حملة التحريات عن دعاء
حسين اخو محمد لقى دعاء عاملة لايك لصفحة نظرية التطور قام صرخ:البت طلعت ملحدة ..الحقوا ابنكوا هيروح من ايديكو
العيلة كلها اتجمعت ساعة ادان الفجر فوق دماغ محمد عشان يتأكدوا ان دعاء ماأثرتش عليه
امه برفق وحنان:قوم ياحبيبى صلى الفجر
ابوه:قوم يابن الكلب صلى
حسين:قوم يا كافر لى خلينى اعرف أنام ع السرير شوية لوحدى

قرروا يستعينوا بصديق ...كلموا طارق صاحبه عشان يعرفوا اذا كان حصله تغييرات معينة فى الفترة الأخيرة..
طارق:والله محمد أرجل واحد صاحبته فى حياتى كلها بس هو فيه عيب واحد..نسوانجى شوية بس
ومن جهة الادب والأخلاق فهو زى الكتاب مابيقول ..ولد ولد صحيح بس فيه حتة صغيرة لو يبطلها يبقى مثالى مثالى مثالى,بيشرب سجاير محشية حاجات غريبة
اما بقى عن الدين فحدث ولا حرج ده هو ده الشيخ بتاعنا ..العلامة اللى بنستفتيه فى امور ديننا ودنيانا بس انا ملاحظ فى الفترة الأخيرة كده نبرة تهكم وسخرية على الإسلام

خطبة الجمعة:
ياميت خسارة على اناس ليس لهم من اسمائهم نصيبا
تلاقى البت اسمها هدى وهى ضلال مبين تعادل فى فسادها وافسادها الف شيطان وشيطان
وتلاقى الواد اسمه محمد وداير ليل نهار يتريق على الصحابة ..بيتريق على الجيل الفريد ..الكافر الزنديق اللى كنت عايز اجوزه بنتى ..مش هاقول على اسمه عشان انا عارف الغيرة والحمية على الاسلام ممكن تخليكوا تروحوا تجيبوه من قفاه هنا..بس انتو عارفينه ..كلكوا عارفينه وهو نايم وسامعنى ابن الكلب 

تحت العمارة

انزل ياكافر..انزل ياكافر
انزل يا كافر..انزل ياكافر

حسين:قوم يابنى لازم تحيى الجمهور ..يااخى قوم..طب شاورلهم من الشباك بس..يااخى عيب مايصحش 

1:هو صحيح نيتشه قال ان الاله مات يازنديق؟
2:طب انت مش شايف ان لو الانسان اصله قرد ده يبقى تشويه للرسل والانبياء؟
3:يعنى انت ابو صرف عليك عشان تلحد ؟
4:خليك ماشى ورا شوية المعاتيه بتوعك
5:طب كنت انزل صلى الجمعة يمكن ربنا يهديك

النهاية :شاشة مقسومة نصين
النص الاول فيه محمد بيحاول يقفل الشباك ويسد ودانه
النص التانى فيه حسين وسحر استغلوا الدوشة وهاريين بعض بوس وحاجات تانية ورا باب مقفول 

ليست هناك تعليقات: