السبت، 4 يناير، 2014

فؤاد حداد ..رامى عصام


1
كان عندى صديقة أبدت رأى سلبى فى فؤاد حداد بناء على قرائتها لديوان أيم العجب والموت
حاولت أقدم لها الراجل بطريقة مختلفة ونجحت وغيرت رأيها فيه فى النهاية
طبعا لو كان صديق ولا كنت هاعبره ولا هاعبر فؤاد حداد نفسه 3:) 
من الأسباب اللى تخليك متحمس لشعر فؤاد حداد إنسانية شعره ومفرداته المصرية اللامتناهية
يميزه عن صلاح جاهين النكهة المصرية الخالصة فى شعره والقرب من أصغر أصغر مواطن مصرى..ده الشاعر اللى بيقولوا عليه يمس شغاف القلب
صلاح جاهين صنايعى فرحان بصنعته
فؤاد حداد وطنى فرحان بوطنيته
 ومن الواضح إن الصفات دى موجودة فى الثلاث أجيال "فؤاد-أمين-أحمد" حداد
أينعم أحمد لسه صغير وبيتعلم فينا بس مايضرش عشان خاطر جده وأبوه
المهم
ياصديقتى يالللى ماكنش عاجبك الديوان أنا لسه مش قادر أتجاوز أول قصيدة فى الديوان..أم صفوت
ولسه باحاول أسقطها على أى أم صفوت حقيقية مش عارف ..يبدو إن فؤاد حداد وهو بيرسم الصورة رسمها من نموذج مستحيل أو نادر الوجود

2
مُغنى الميادين
مغنى الميادين ماينفعش يتقال عليه مطرب لأن الطرب مش وارد بنسبة كبيرة وسط المظاهرات والإضرابات العمالية والاعتصامات
فيه حاجات تانية مهمة فى الأوقات دى أهمها رفع الروح المعنوية وإعطاء شحنات حماس تكفى لحشد محتجين جدد ولصد محاولات الأمن المتكررة للفض
معايير كل حاجة بتبقى مختلفة تماما عن المألوف
تخيل لو عبد الوهاب عمل بوستر لأحد ألبوماته عبارة عن ملابس داخلية منشورة على حبل أو سمى اسطوانة من اسطواناته باسم زى "الملسة"؟
طبعا قول على مستقبله الفنى يا رحمن يارحيم
رامى عصام عمل كده ولسه عايش وبيغنى 3:) 
ممكن نختلف على مايقدمه رامى عصام لكن مش ممكن نختلف على كلمة "بيغنى" لا عشان صوته ولا عشان مزيكته ولا عشان طبيعة اللى بيقدمه
هو بيغنى بس مالوش مستقبل بره الميادين خالص
والميدان هو البيئة المثالية لأعمال كتيرة عظيمة لفنانين عظام زى بيرم التونسى
خد عندك مثلا..
ليه امشى حافى ،وانا منبت مراكيبكم

ليه فرشى عريان،وانا منجّد مراتبكم

ليه بيتى خربان ،وانا نجّار دواليبكم

هى كده قسمتى؟

الله يحاسبكم!

ساكنين علالى العتب،وانا اللى بانيها

فارشين مفارش قصب،ناسج حواشيها

قانيين سواقى دهب،ونا اللى ادور فيها

يارب ماهوش حسد

لكن بعاتبكم

من الصباح للمسا،والمطرقه فيدى

صابر على دى الاسا ! حتى نهار عيدى

ابن السبيل انكسى ، واسحب هرابيدى

تتعروا من مشيتى

واخجل اخاطبكم

ليه تهدمونى وناللى عزكم بانى

انا اللى فوق جسمكم قطنى وكتانى

عيلتى فى يوم دفنتى مالقيتش اكفانى

حتى الاسيّه وانا راحل وسايبكم؟

بيتهيألى دى لو اتغنت فى استوديو ممكن بيرم التونسى يطلع يدور الضرب والشتيمة فينا كلنا

مع الفارق فى السن والتاريخ والموهبة ممكن اقول ان رامى عصام شبه الفنان العربى سامى حواط .. شبهه شوية
سامى حواط اغانيه قليلة بس مؤثرة ولها نفس الطابع الاحتجاجى زى "الرأى العام" وزى "العامل" وزى "أحد الإخوان".

ليست هناك تعليقات: