الأحد، 2 فبراير، 2014

كلام كفار



1
لو قلتلك إن حفظ كتاب كبير زى القرآن غلط هتزعل منى
طيب احفظه إنت بلاش تظلم أطفالك
أيوه..افضى لربنا شوية واحفظ كتابه يا أخى!
مفيش ولا مدرسة من مدارس التربية قالت إن الطفل يسيب كل حاجة ويقعد يمقق عنيه ويحفظ كده
حرام عليك
حتى الصلاح والتقوى مش مقرونين بحفظ القرآن
ولا الذكاء مقرون
ولا الفن والإبداع
هتقولى ام كلثوم كانت حافظة القرآن وبقت كوكب الشرق؟
هقولك شوف رأى الشيخ كشك فيها 3:)
عايز تخالف الشيخ كشك وهو مات ساجد ياكافر؟ 3:)
هتعمل زى ابو الفتوح وتقولى حديث من نوعية"عجبا للمؤمن أمره كله خير"؟ 3:)
بلاش أم كلثوم
طه حسين 3:)
2
يجرى إيه لو الحجاج بن يوسف كان ذكى شوية وقال لسعيد بن جبير "خذوا ما آتيناكم بقوة"؟
3
أصبح لدى الآن صديق بورسعيدى وصديقة موريتانية..ياللبهجة.
4
آية المؤمن ثلاث
1معاه فلوس
2معاه فلوس
3معاه فلوس
5
وحق الآلهة
وحق الآلهة
وحق الآلهة كمان مرة يامؤمن بطلت أشوف أى شيوخ بتاتا بس كنت إمبارح باقلب فى التلفزيون وجبت قناة رابعة أو الشرعية مش فاكر بالظبط وسيبت الريموت واتلخمت فى الشغل شوية
جابوا دعاء على السيسى وانصاره لقيت -فجأة كده كانها عفريت طلع من ودن واحد -واحدة منقبة واقفة تحت التلفزيون ورافعة اديها الاتنين وبتقول آمين
مش مهم
المهم انى لقيت برنامج لوجدى غنيم اسمه دروس ثورية
 اوعى تفتكر انى شخرت
لست انا ذلك الرجل
انا بس طلع على بالى اعمل برنامجين تانيين
برنامج الاخلاق الحميدة للاخ الفاضل سوكا صبى العالمة
 وبرنامج أهل السنة والتوحيد للأخ فيكتور
6
مفيش ولا قصة حب بين واحد فقير وواحدة ثرية اكتملت للنهاية ..بلاش حواديت حمضانة
7
-سعاد
*نعم
-مش احنا كفار ياسعاد؟
*احنا ربوبيين ياجحش
-يعنى كفار؟
*يوووووه ماتزهقنيش بقى ..دى غير دى
-أيوه يعنى كفار؟
*أيوه ياسيدى كفار كفار ..عايز ايه؟
-يعنى المفروض نرقص ونعمل حاجات قلة ادب بقى.
8
اختار الجار قبل الدار
والمزة قبل الغرزة
والمعلم قبل الدرس
9
وفى درس الحب
فضلتى تلفى حواليا زى قمر اهبل بيلف حوالين الارض
لحاد ماخليتينى
شمس محروقة بتاكل فى بعضها وبتلف حوالين نفسها
مفيش ثقب اسود يبلعنا احنا الاتنين عشان نرتاح؟
10
أيها الناس
أيها ولاد الكلب
لما حد يفكر يسلم على يبقى سؤال غير ده
"اتجوزت ولا لسه؟"
11
أيها الناس
أيها ولاد الكلب
لما حد يفكر يسلم على يبقى سؤال غير ده
"اتجوزت ولا لسه؟"
12
هيا بنا إلى جهنم.
سأنام وأترك الأبواب مُشرعة للشياطين.
13
يكاد يكون الفن الشعبى الفلسطينى هو الأحلى والأطعم على الإطلاق.
14

المفروض نعمل برنامج زى ارب جوت تالنت بس نسخة دينية
مسلم vs مسيحى
مؤمن vs ملحد
سنى vs شيعى
كاثوليكى vs بروتستانتى

ونديهم من الشهرة والثروة اللى بيحلموا بيه مقابل انهم يسيبونا فى حالنا نشتغل ونعيش فى سلام
15
خمسة لن يدخلون الجنة أو يشمون لها ريحا:
1-الواد بتاع كشرى التابعى عشان بيحط الحمص بإيده.
2-حاتى فهيد عشان بيبيع السندوتش ب17 جنيه.
3-بتاع الجرايد عشان مش عارف يجيبلى"الحرب والسلام"
4-جنات
5-أحمد جعفر
16
كل ماحد يحكى قدامى عن الاختلاط وآثاره السيئة على البشرية ارجع بذاكرتى للعدد الضخم من الجوارى والمحظيات اللى كانوا عند الخلفاء وكبار الصحابة واقول لنفسى
4000 جارية ومحظية حلال عشان للى اشتراهم اشتراهم جملة
ولية واحدة بخمسين جنيه حرام عشان البيع هنا قطاعى
اللعنة على سواقين الميكروباص وعلى الفضائيات الدينية وعلى الناس الكبيرة
انا عايز ابوس ,اعمل ايه دللوقتى؟!
17
غنِ قبل أن يُغنى عليك
18

الطفلة المعجزة
الغنا عندى مُقدس
يعنى ماباحبش العك فيه
عمرى مابلعت فكرة الطفل أو الطفلة المعجزة
لو كانت لدى الطفل موهبة تلوح فى الأفق يروح  ينميها مش يسبق الأحداث ويطلع يستنزفها ويستنزفنا ويشغل مكان ع الفاضى
من سنتين كان فيه ناس كتيرة معجبة ب ناى البرغوثى
نسوها دللوقتى ..باختصار لأنها مُؤهلة للنسيان عشان لسه عودها أخضر ومااستوتش
قارن بين ريما خشيش فى صغرها لما كانت طفلة بتتعلم الغنا فينا وريما خشيش لما نضجت وبقت من ربات الفنون وإنت تعرف
19
أفتح الفيلم الجديد بتاع هيو جاكمان ألاقيه زيادة عن ساعتين ونص؟!
كل ده عشان بنته اتخطفت؟
عطلاق لو ابويا ذات نفسه اتخطف مااستنى اكتر من ربع ساعة  3:)
20

لما كلنا بنفهم
أومال مين اللى ودى البلد فى داهية؟ 3:)

21
الإسلاميين بيقولوا على الشعوب "العوام"
الأرستقراطيين بيقولوا عليهم "الغوغاء والسوقة"
الليبراليين بيقولو عليهم "التنابلة وشمامين الكُلة"
الشيوعيين بيقولو عليهم"الجماهير-لا مؤاخذة-العريضة"

22
المسافة بين مبادئك وبين سلوكك=المسافة بينك وبين نفسك

23

السؤال مسعور

24

أتدرون من الكاتب؟
هو شخص بإمكانه التحرر من غواية القراءة على فترات .

25

ليه مجدى يعقوب مابيصنفش نشاطه فى مصر تحت عنوان مسيحى؟..وليكن جمعيةأنصار المسيح" مثلا.
يعنى أهو يتأسى بولاد الوسخة اللى بيشحتوا من طوب الأرض علينا ومسميين نفسهم أنصار السنة والجمعية الشرعية

26

الصدمة الفكرية اللى الملحدين بيتكلموا عنها نظريا بالنسبة للمتدينين يقابلها على أرض الواقع صدمة مماثلة .ألا وهى الحرائق والتفجيرات.

27

الواحد مننا بيسود من جوه إزاى؟
بسيطة
البنى آدم بيت والعقل بابه وشبابيكه
اقفل الباب والشبابيك
البيت يكمكم ويضلم

28
لم يستفد من الثورة المصرية غيرالموظفين
والموظف فى مصر كائن قليل الذمة معدوم الأخلاق
الثورة فقدت اتجاهها من أول لحظة

29

يُفترض إنى لما ألاقيك كاره للناصرية خصوصا ولليسار عموما إنى أسيب الموزتين اللى فالإنبوكس دول وأقعد أحايل فيك وأقولك كده مايصحش وعيب ؟!
هادخلك الإسلام يعنى؟!
ياعم أنا أصلا عامل إنى شيوعى عشان أهلى مايضغطوش عليا فى حاجتين
الحموم وحلاقة الدقن
خصوصا فى البرد اللى احنا فيه ده

30

الحكاية تبتدى بناصرفوبيا وجيفارافوبيا ويسارفوبيا
وتنتهى بالحساسية من العدالة وبعدين الخوف منها
عدالةفوبيا
لازم نكون موضوعيين
خدونى مثل اعلى ليكو
يعنى انا بكره محمد مرسى
اقوم اصدق وسائل الاعلام المغرضة اللى بتقولك اكل بعشرة مليون جمبرى ؟
وأيم الله لا
لست أنا ذلك الرجل
الجمبرى ابو عشرة مليون ده يادوب تسليك زور بس ..محدش جاب سيرة المانجة خالص!

31
فى مصر
البنت تحترم واحد وتحبه بس تتجوز حد غيره عشان جاهز
الواحد يسيب الاسلام او المسيحية بس فى السر عشان الميراث والمكاسب الاجتماعية
تشتم الداخلية بس عايز ابنك يدخل كلية الشرطة
رجل الاعمال ياكل عرق العمال الصبح بس يطلع فى التلفزيون بالليل يتبرع بمليون جنيه لدار ايتام وهو بيعيط
الشيخ يطلع ع الفضائيات يبكى وهو بيتكلم ع الزهد وينزل يركب عربية بمليون جنيه عشان يروح ع الفيلا يتعشى خروف وينام خفيف بعد مايقضى وطره مع واحدة من مرتاته الأربعة
الممثل اللطيف يروح يجيب الكوكايين الصبح بس يطلع بالليل يتكلم عن ضرورة العمل ويحب فى عجلة الانتاج
تنام كل يوم مع واحدة بس تؤيد حازم صاح أبو اسماعين او الاخوان عشان مفكر انك بكده بتكفر عن ذنوبك وتخش الجنة
يكون فى مقدورك تساعد شباب فى بداية حياتهم وتختصر عليهم وقت كتير بس تكتفى بانك كل ما تشوفهم تعيد عليهم نفس الاسطوانة المشروخة بتاعت كفاحك واعتمادك على نفسك

32
كل مشاريعى لها نقطة بداية واحدة
الخروج من مصر
تحس انى يهودى 3:)

33

الفكرة اللى بتموت وما بتطلعش للنور مابتموتش لوحدها
بتقتل بناتها معاها

34

مواطن ذكى سألنى سؤال وجيه:
هما المصريين بيعرفوا يبوسوا؟
35

عضو الفشخرة عندى ضامر
#قانون_الاستعمال
36
إن أول ما يبحث عنه المتعافى من جراحة الفتاء أو الختان هو عضوه الذكرى
هو فين؟
هو فين؟
هو فين؟
دوروا معانا ياجماعة
 وكذل فأول مايبحث عنه الملحد الذى تسلف سابقا هو عقله

37

البقاء للأبضن

38
قلبى بيوجعنى من المسافات

39

سعيد صالح كان بيذاكر مع واحد صاحبه فى بيروت
وعاصم عبماجد بيفر بدينه حاليا فى قطر

40
طول عمرى احب الضحك وذكر الضحك فى الاغانى لكل الناس
نسماية هالة-اضحك بقى وافرجها ياعم -الدنيا بتضحك.................
ماعدا فريد الأطرش
تحس وهو بيقول "يابو ضحكة جنان" ان حد بيغزه فى بطنه بمطواة ولا بيقلعله ضوافره!

41

حبيت أوى تعبير"حرب الصدور العارية"
وكل واحد ونيته وعلامه بقى

42
تعلم الشرعية فى 24 ساعة بدون معلم:
1-كمل نوم للضهر ونزل حريمك يعملوا حركة سبعة الصبح فى الشارع
2-احفظ البيت بتاع الإمام الشافعى"تموت الأسد فى الصحراء جوعا ولحم الضأن يأكله الكلاب"
3-اشتم فى الاعلام الفاسد
4-اترحم على ايام الملكية
5-هات صور الكوارث الطبيعية من حول العالم وقول:شوف الانقلابيين ..
6-لو حد جاب سيرة "بن لادن-الظواهرى-عاصم عبدالماجد-صفوت حجازى -بديع-العريان" بسوء قدامك اوعى تسيبه غير بعد ما تفشخ امه بما لا يخالف شرع الله
7-اتهم الجميع بالجهل
8-اعمل "تنشل الأيادى" رنة موبايلك
9-عيد وزيد ف خطورة الحرب على الإسلام
10-شجع الاهلى عشان ابوتريكة
11-وجه رسالة تهديد للداخل بالعربى ورسالة تحسيس للخارج بالانجليزى على موقع الرسمى
12-قول الجملة دى دايما"والله انا طول عمرى وسخ وعايز اتوب عشان ده مشيت مع الناس اللى يعرفوا ربنا"
13-عاير الناس بان كنت بتعمل فيهم خير
14-وزع صكوك الجنة والنار
15-ربى دقنك واتفرج على صافيناز من تحت لتحت
16-لو انت دكتور متعالجش العيال اللى اهاليهم انقلابيين ولو انت مدرس احلق للبنات السافرات شعرهم
17-اقرا مقال فهمى هويدى
18-قول نفس الهتافات اللى كنت بتخون اصحابها من يومين

43

بيحصل انى باحب اتسلى ساعات
وغالبا باصطاد الناس اللى شكلها مستحمى وراكبة عربية ودائمة الاتصال بالفيس بوك من التليفون والتاب والحاجات العجيبة دى
الزبون اخوان باتقمص شخصية سيد قطب
الزبون سلفى باقلب أيمن الظواهرى
الزبون صوفى تلاقينى سيد البدوى
ليبرالى ابقى ادم سميث
شيوعى اعمله  ماركس

الراجل يقضى مصلحته ويمشى مبسوط ويكتب ع الفيس انه قابل واحد حلوانى ياللعجب ياللعجب ياللعجب مثقف وبيفهم واحنا بنقعد نضحك بعدها لما ودانا تحمر ووشنا يوشك على التشقق من كتر الضحك على سعادة البيه المستشار ولا الباشا الدكتور

طبعا البقال بيعمل زى مابعمل وبتاع الفول وسواق التاكسى الخ الخ الخ

فلما تلاقى بعد كده كاتب انه قابل نجار ولا سباك ولا حتى مبلط بيفهم اعرف انه مصلحة طوب الارض اللى ف الشارع اتسلى عليه.

44

غالبا هناك حلقة مفقودة بينى وبين الناس ..المسافة التى أستطيع قطعها تجاه أحدهم لا تكفى لصنع صديق مُقرب..اختلف هذا كثيرا بعد استخدامى لوسائل الاتصال الحديثة,والآن تبقى الجغرافيا والسياسة حجر عثرة فى طريق تكوين عوالمى الخاصة.

45

اللهم اكفنا شر الأرستقراطى إذا تدين والفقير إذا كفر.

46

فيها حاجة لو دعيت لمليونية الجمعة الجاية بعنوان"الحاضر يعلم الغايب ...يلعن ابو ام القرايب"؟

47

مين بيتكلم ع الحجاب اكتر..الشيوخ ولا الملحدين؟..الملحدين!
مين بيتكلم ع الجنس اكتر..بطلات البورنو ولا الشيوخ؟..الشيوخ!
مين بيتكلم عن المثلية اكتر..المثلى ولا الليبرالى؟..الليبرالى!
مين بيتكلم عن الثورة أكتر..الثوار ولا الفلول؟..الفلول!
مين بيتكلم عن الفاجومى أكتر..المدعين ولا الشعرا؟..المدعين!
مين بيتكلم عن الزهد أكتر..الغنى ولا الفقير؟..الغنى!

48

لا لخلط الدين بالسياسة
دى نصباية ودى نصباية

49

يارفيق
الثروة مش من أهدافى
أنا ممكن أمشى حافى
بس أشوف الناس مبسوطة

50
لاتتوقع من المواطن الذى لم تهتم بمطالبه وأعطيت الأولوية لحقوق المثليين ونشر الإلحاد أن يهتم بك عندما تقع فى قبضة الأجهزة الأمنية أو الجماعات التكفيرية

51

سيجىء اليوم الذى تنطق فيه أسوار المصالح الحكومية:
يا أيها المواطنون المصريون التعساء ..هذا خريج حقوق فاقتلوه

52

ستقتلون أنفسكم بالتكرار والفوضى.
53

يابن ال...........
بتشتم اخوك واكتشفت ان ابوك داخل م الباب وهيسمع الشتمة
تتدارك ازاى؟
-يابن النيل؟
-يابن الشعب؟
-يابن الج....الجماهير؟
-يابن الك....الكادحين؟
54

التعليقات السمجة على اى واحد يتكلم فى الدين:
-انت فاكر نفسك كده بقيت مثقف؟
-انت عشان قريتلك كتابين؟
-انت تعرف اسم البخارى كامل؟
-انت حافظ كام جزء من القرآن؟
-انت هتجيب نفسك للعلماء؟
-انت فاضى وعندك فراغ
-روح دورل على شغلة
-طول عمرك"خالف تعرف"
-يا أخى اتق الله ,احنا هنعرف احسن من الصحابة؟
-فعلا ولد الاسلام غريبا وسيعود غريبا
-عملولك غسيل دماغ!
-ابوك عارف باللى بتقوله ده؟
-انت نت كويس..ايه اللى جرالك؟!
-الموضوع فيه موزة اكيد وانت عايز تعمل قدامها انك بتفهم
-صليت الفجر امبارح؟
-مابتجيش تصلى جماعة ليه؟
-عايزك تقعد مع الشيخ عامر* شوية
*غالبا مبيعرفش يقرا صح وومعاه ديبلوم صنايع
 -انت بتسمع اغانى كتير؟..طبعا المعصية بتجيب معصية
-اللى انت ماشى وراهم دول عايزين يهدموا الاسلام
-انت بقى ماشى ورا ابراهيم عيسى اللى بيقول الحجاب مش فرض؟
-جمال البنا بيقول شرب السجاي عادى فى نهار رمضان
-انت عارف الشيوخ اللى مش عاجبينك دول بيسلم على ايدهم ام كل يوم؟
-يعنى اصدقك ولا اصدق الشيخ ابواسحق "اعلم اهل الارض بالحديث"؟
-لما تكون عيان والدكتور يكتبلك الروشتة مش بتروح تصرفها وانت ساكت؟..اشمعنى بقى مبتجادلش مع الدكتور وتجادل مع الشيوخ يااخى؟
-لحوم العلماء مسمومة
يووووووووووه التعليقات السمجة كتير بس انا زهقت

55

من وحى خطبة الجمعة:

سأله: ما هذا الغلام منك؟
قال أبو طالب: إنه ابني..
قال بحيرا: ما ينبغي أن يكون أبوه حيا..
قال أبو طالب: إنه ابن أخي.. مات أبوه وأمه حبلي به..
قال بحيرا: صدقت.. ارجع به إلي بلدك واحذر عليه اليهود..

الدرس المُستفاد:
بابا وماما دايما بيكونوا عقبة فى طريق النبوغ
امامك ثلاث خطوات كى تصبح عظيما
1-اقتل بابا وماما
2-اقتل ابوك وامك
3-اقتل ولاد الجزمة اللى قاعدين جوه دول

56



على فكرة شتيمتك فى الناصرية لن تسهم فى اعتمادك كثورى
نظام عبدالناصر كان مثال وقدوة فى زمنه وساعد وساهم فى تحرير بلدان كتير من الاستعمار الغربى الوسخ
ياسيدى بص لنيلسون مانديلا اللى حضرتك عامل مناحة عليه وشوف رايه فى عبدالناصر وشوف جيفارا كمان
ومش هتعتمدك كمواطن تحب الانجاز وتكره النطاعة
 البيروقراطية والتناحة اللى انت شايفهم دول انوا خلايا نحل فى الستينات عملت مصانع وسدود واذاعة وسينما وجيوش وقعت وقامت وشعب كان حافى ولبس شباشب ياراجل
ولا هتعتمدك كعالم
ومش معقول يعنى عشان قريت كتابين فى الفيزيا وشفت فيلمين وثائقيين ان بقيت عالم
ياراجل عيب


بص كده ترتيب جامعتنا كان وضعه ايه ايام عبدالناصر ووضعه ايه حاليا

هناك تعليق واحد:

مواقع تسوق يقول...

مقالة رائعة ما شاء الله شكرا لك