الجمعة، 4 أبريل، 2014

إنت وحيدة؟



إنت وحيدة؟
وأنا وحيد
يللا نألف غنوة جديدة
نضحك قد ما نقدر فيها
ع المواعيد
والهمسات
ومكالمات الليل الهادية
على حواديت الحب الماشية
ع الكورنيش
الإيد فى الإيد
على تمثيل الدفا والود
على تمجيد ونفاق كيوبيد
كل الأسهم عنده اتباعت
إلا ما رحم القلب
والتنهيد
يللا نألف غنوة جديدة
ما اتلمستش
كل أغانى الحب إتقالت
حمضت
ماعت
الإحساس بقى شكله بليد

يللا نقلب جوه الدفتر
أنا ولا فخر بقيت لما أسهر
وأما أغنى وأقول يا حبيبتى
دوغرى تغمض ..تطلب أعيد
وإنت؟
جالك مرة صحيح دبدوب؟
جالك وردة؟
بعتولك جوابات فى بريد؟
عارف إنه كلام فى الفاضى
الماضى أهو راح بقى ماضى
بس أهو شىء فى الوحدة يصبر

أنا حاسس إن أنا بالونة
لسه يدوبك نفخة وأفرقع
جوه فراغ
بره فراغ
اكشفى قلبك وإدعى بذمة
ادعى يجوز من بؤك يسمع

ولا بلاش
الدعوات جت عندى ووقفت
مابتطلعش
يبدو إن ملاك الرحمة بتاعى
مات وشبع موت
بصى هنااااااااااااااااااااااك
أهوه ف النعش

نفسى ف واحدة دماغها سليمة
لا أبقى مطالب أقولها تقلع
ولا أقولها تلبس خيمة
نفسى فى واحدة رموشها حكيمة
تخمش روحى وما توجعش
وأما تخاصم
تزعل تزعل وما تقطعش

بصى
أنا هابعت للسما كتالوج
تطلع دعوة
وتنزل موج
مايغرقش
تطلع زى الابتهالات
تنزل نقش
تطلع بوسة
تنزل بوسة
سخنة وحامية
بس عروسة
مابتحرقش

الاكتئاب ضريبة الوحدة
 مين هيحاسب؟
أنا لا ورايا ولا قدامى
يمكن ربنا بيأيد
ويشككلى يجوز والله
على جلدة دفتر احلامى
عدى العمر
عدى كمان كام عمر عليه
وما بادفعش
خايف يزهق منى الآخر
ويقوللى :
بره ماتنفعش
وأنا بيى وبينى يعنى
عارف نفسى
بانزل واطلع
مجرد جحش

تاخدينى على عيبى؟
ونقضيها هزار فى هزار؟
أنا مش شوال فلوس
ولا عسول
وكمان وكمان وكمان
يمكن مش بعرف ابوس
وباحب من باب الفضول
وباسيب من باب الفشل

وعندى حكمة نصها
انهى العلاقة فى نصها


ليست هناك تعليقات: