السبت، 7 يونيو، 2014

حفل التنصيب



عجوة ياسادة عجوة
إله مسكر
اركع وإدى تمامك
إياك تفكر
وإلحقلك صف أول
واعرف مذهب إمامك
فلتسهب فى المديح
يبقى بدل سلامك
واحفظ وتعالى بكرة
بس ابقى بَدَر

الأولوية للقرون
القرن الأطول فالأقصر
الشكل مهم
بالبدلة تبان طيب وأمير
وإن كنت ف أصلك شيخ منصر
الأولوية للبليغ
اللى يطول فى الكلام
واللى يفسر
أدوات العرص الأزلية
اللغة والمظهر
والصوت الهادى
والوش الأصفر
يضحك علطول
ووقت الخطبة
يبان متأثر

والمال والعز
وأكل الوز
وكرش وزيرنا إذ يهتز
الله من فوق يا ملك بيبص
على الحاشية الماشية
إذا تترص
ويعض صوابعه
ويراجع نفسه فى أمر الخلق
ويدور ع الأموات فى النص
كام ألف اتداسوا
وياترى ف السكة كمان كام ألف
دراكولا الجائع واكل ناسه
لسه هياكل ولا خلاص؟
اتنيل خف

 
مبروك نياشينك ع البدلة
وتعيش وتدوب جيل واتنين
مبروك نياشينك من نملة
عملوك تنين
ياسعادة الباشا يا متمكن
لا مكان بيحدك
لازمان بيحوشك
بتبص البصة ليوم الأحد
يقلب الاتنين
وتخوف روسيا وأمريكا
بنظرة عين
وتنام
 فينام الكون وياك
وتصحى
 بتتاوب مزيكا
تعطس 
فيقوم إعصار ف الصين

مبروك نياشينك ياابو نياشين
هنموت م القهر؟
لاء أهوه عايشين
لو كنت بتسمع حواديت
كنت هتعرف مصر
الحلو بيطرد فى الخاتمة
كل الوحشين

 مبروك نياشينك
 وصورنا ف الشارع أوضح
نرسم فى النور اللى يشينك
تبعت فى الضلمة جنود تمسح
كام سور حايشينا وحايشينك؟
بكرة المهدود م السور يفضح



اقر الكف
اقرا فناجين القهوة
واقرا كاسات الخمرة
واقولك على لون الايام
اللى فاكرها ياريس بيضا
طلعت حمرا
حمرا تمام زى ال.......
زى الايه؟
اوعى يابيه
انا مش غلاط
بجوز اوقات خلاط
باشبك كل الدنيا فى جملة
تيجى حاجات تركب فى حاجات 

زى الدولة ماتركب ثورة
زى الحكمة ماتبقى بشورة
تمسح كل آثار الدم
وتوليك
زى الصبح مايقلب ليل
زى ماناخد ندل خليل
زى مايركب روحنا الهم
يامعاليك
زى ما عيل يقلب شيخ
زى ماضحكة تبقى صريخ
زى ما ينشف قلب الأم
ولا يدينا ولا يديك
زى ما مصر تبدل دينها
زى ما يكسر غاصب عينها
ولا تتألم ولا تهتم
وتغرم بيك
 

ليست هناك تعليقات: