الأحد، 24 أغسطس، 2014

كأننى هُنا

كأننى هُنا..مش متأكد
شوف كده أوراقى وأقلامى
شوف وشى
عيونى
مناخيرى
سريرى
وريحة عرقى 
دور فى مشاعرى 
شوف الخوف والضحكة
شوف الحُب 
شوف الكُره
شوف الرعب

من البدايات فى السكة

أنا موجود؟
انكش تانى
وياريت بضمير
يمكن تلاقى حتة منى ع الرصيف
يمكن يلوصك مرة دمى
وإنت بتقطع رغيف
يمكن تلاقينى فى حلم
 بشارع واسع
وهوا نضيف
يمكن يمكن
تلمحنى بادندن
بكلام عاقل 
أو تخاريف

لو كنت باحب اتصور
كنت هتعرفلى ملامح
كالعادة بخاف م الصورة
أنا عارف نفسى
فى صدرى هناااااااااااك
فيه حاجة مكسورة
وما احبش حد يشوفها
باكره نظرات العطف
وأكره أبان للخلق ضعيف
مع إنى فى غاية الضعف
بس أهو كِبر

وقسمنى البيه
فتافيت فتافيت
علشان الهضم
له معدة رقيقة
وماتستحملش العضم
قسمنى البيه بهدوء أعصاب
وبقيت كام واحد
ورا كام باب
تقفيل برانى
بين ضد وضد
يمين وشمال
قدام ورانى
وبقيت كام واحد
معرفش منهم حد 

وشى ياوشى قوللى أنا ليه
كل طريق باتعب وألاقيه
يهرب يهرب ..يهرب ليه؟
وشى ياوشى قوللى أنا ليه
إدينى أسباب للعيشة
إدينى أو أشد الفيشة
وأبقى كأنى مكنتش خالص
إنسان اتحرر م الناقص
لا بيبكى على بكرة بتاتا
ولا يترنح جوه ماضيه

وشى ياوشى فين ألاقينى؟
فى مشنة فجل على رصيف؟
ولا فى رقصة تانجو لاتينى؟
ولا مخلل جوه رغيف؟

وشى ياوشى قوللى بجد
أشبه أنا فى وساختى لحد؟
ولا أنا طاهر..نقى ونضيف؟

وشى ياوشى قوللى أنا مين
أنا مش فارس 
ولا نافع تعليم ومدارس
ولا عضلات
ولا حامى الأوطان ولا حارس

أنا كام وش؟

وش لماما
وش لبابا
وش كلاما
وش كتابة
وش حضورا
وش غيابا
وش نعيما
وش عذابا
وش عمارا
وش خرابا
وش لطافة
وش عصابة
وش تَجبُر
وش غلابا

قسمتنى عيونها نصين
نص تايه
ونص تانى 
مااعرفش فين
نص لاجىء ع الموانى
ونص عايم
من غير لا مركب
ولا مجدافين
نص ناطق بالأغانى
ونص أخرس
جوه منه 
مكنون دفين
قسمتنى عيونها
وراحت فين؟
قسمتنى وراحت
قسمتنى عيونها وارتاحت

ليست هناك تعليقات: