الخميس، 21 مايو 2015

بين ابن الزبال وابن القاضي



ليه معندناش قضاة محترمين؟
=================

لماذا لا يوجد لدينا قضاة مثقفون أصحاب رؤى ثاقبة ومشاريع حضارية ؟

لأن القضاة في مصر حاجة من اتنين..

إما ابن مستشار أو قاضي  أو ابن ناس بتوع ربنا ومعاهم فلوس

 الأول ده متربي على العز الناتج من فساد القضاء وتبعيته للدولة وعليه لازم يطلع من سلسال مبارك طنطاوي السيسي .. يعني زند صغير.

والزند الصغير يا رعاك الله فاهم إن الدولة هي الحاكم والحاشية و باقي الشعب ضيوف وخدامين , ومحدش من الخدامين ينفع يتقدم لصفوف النبلاء .

الزند الصغير بيطلع متربي على قناعات صعب تغييرها لأنه مصدقها وعنده تكييف دينى واجتماعي ليها , زي حكاية ابن الزبال اللي ماينفعش يبقى قاضي .. فيه تكييف اجتماعي وديني ليه , تخيل؟ 

العين ما تعلاش عن الحاجب
وجعلنا بعضكم فوق بعضٍ درجات

مؤهلات الزند الصغير تتلخص في إنه ابن عز .
 ناهيك عن التخلف اللي بيدرسوه في كليات الحقوق , الزند الصغير لها نصيب إضافي من التخلف ..
أوله أبوه وأمه اللي بيربوه على كونه فوق الناس
تانيه الناس نفسهم اللي بيبجلوه ويجلوه زلفى لسلطة أبوه
تالته اللامبالاة الرهيبة اللى بتنمو بداخله لأنه كده كده هيطلع وكيل نيابة .. يشتغل ولا ينتج ولا يتعلم ليه؟ .. والنتيجة طبعا كائن متخلف معفن من جوه بس مغلف بقشرة براقة .

التاني بتاع ربنا اللي معاه فلوس بيدخل ابنه القضا بالرشوة .. أيوه بتاع ربنا اللى معاه فلوس ده بيفتحها ع البحري ساعة المصلحة وبيرجع يتوب عادي جدا .. لازم يعمل ذنب أصلا عشان يتوب بعده ..

أما يتوب على غير ريق يعني؟!

بتوع ربنا دول فاكرين إن الدين عليه حرب شعواء من الغرب الكافر والداخل العفن الفاجر , فبيدور على جماعة ينضوي تحت لوائها عشان يرضي ضميره ويكون مع الجماعة .

إذا ارتُكِبت الحماقة واقتثرِفَ الإثم في جماعة الضمير ما بيتوجعش أوي.

غالبًا الجماعة دي بتكون الإخوان المسلمين اللي القاضي العضو فيها بيدلس ويزور ويقول عن نفسه قاضي من اجل مصر وهو قاضي من اجل الإخوان.

مؤهلاته 
راجل بتاع ربنا .. مغسل وضامن جنة , يشتغل ويتعب وينتج ليه؟!

-عمرك سمعت عن طالب حب كلية حقوق ودخلها طوعًا مع إنه كان جايب مجموع عالي؟
*في الغالب لاء.
-عمرك سمعت عن شاب عصامي ومكافح اتخرج من العربخانة دي وبقي وكيل نيابة؟
*في المطلق لاء.
-عمرك سمعت عن قاضي نبغة في أي مجال؟
*في الغالب لاء.
-عمرك سمعت عن قاضي موهوب؟
*في الغالب لاء.
-عمرك سمعت عن قاضي حقاني ؟
* آه سمعت عن واحد في كوكب المريخ.

ليست هناك تعليقات: